ജയ്പൂര്‍: ഇന്ത്യയിലെ ആഘോഷാവസരങ്ങളില്‍ ഇന്ത്യാ-പാക് അതിര്‍ത്തിയില്‍ കാലങ്ങളായി മധുരപലഹാരങ്ങള്‍ നല്‍കുന്ന രീതിയുണ്ടായിരുന്നു. ഇത്തവണത്തെ ദീപാവലി ദിനത്തില്‍ ഈ മധുര വിതരണം ഇന്ത്യ നടത്തിയില്ല. പലഹാരങ്ങള്‍ വിതരണം ചെയ്യരുതെന്ന് കേന്ദ്ര ആഭ്യന്തര മന്ത്രാലയം അതിര്‍ത്തി സുരക്ഷാ സേനയ്ക്ക് നിര്‍ദേശം നല്‍കിയതിനെത്തുടര്‍ന്നാണ് തീരുമാനം.

പതിറ്റാണ്ടുകളായി സ്വാതന്ത്ര്യ ദിനം, റിപ്പബ്ലിക് ദിനം, ഹോളി, ദീപാവലി, ഈദ് തുടങ്ങിയ ദേശീയവും മതപരവുമായ എല്ലാ ആഘോഷ വേളകളിലും ഇന്ത്യ- പാക് സൈനികര്‍ മധുരപലഹാരങ്ങളും ആശംസകളും കൈമാറിയിരുന്നു. സംഘര്‍ഷങ്ങള്‍ക്കിടയിലും പരസ്പര സൗഹാര്‍ദത്തിന്റെ പ്രതീകമാണ് മധുരപലഹാരങ്ങള്‍ വിതരണം ചെയ്യല്‍.

ഏപ്രില്‍ 22ന് പഹല്‍ഗാമില്‍ നടന്ന ഭീകരാക്രമണത്തില്‍ പാകിസ്ഥാന്‍ ആസ്ഥാനമായുള്ള തീവ്രവാദികള്‍ 26 പേരെ കൊലപ്പെടുത്തിയതിനെത്തുടര്‍ന്നാണ് ഇന്ത്യ പാകിസ്ഥാനെതിരെ നിലപാട് കടുപ്പിച്ചത്.

ഇത്തവണ സ്വാതന്ത്ര്യ ദിനത്തിനും മധുരവിതരണം നടത്തിയിരുന്നില്ല. അതിര്‍ത്തി കടന്നുള്ള ഭീകരത തുടരുന്നിടത്തോളം ഇത് നിര്‍ത്തിവെക്കാനാണ് നിര്‍ദേശമെന്ന് മുതിര്‍ന്ന സുരക്ഷാ ഉദ്യോഗസ്ഥന്‍ പറഞ്ഞു. ഇരുപക്ഷവും ഹസ്തദാനവും നടത്തിയില്ല.