ന്യൂഡല്ഹി: പുതിയ ഡിജിറ്റല് പേയ്മെന്റ് സംവിധാനമായ ഇ- റുപ്പിക്ക് പ്രധാനമന്ത്രി നരേന്ദ്രമോദി തുടക്കമിട്ടു. നാഷണല് പേയ്മെന്റ്സ് കോര്പ്പറേഷന് ഓഫ് ഇന്ത്യ വികസിപ്പിച്ച പുതിയ പേയ്മെന്റ് സംവിധാനം വീഡിയോ കോണ്ഫറന്സിലൂടെയാണ് മോദി ഉദ്ഘാടനം ചെയ്തത്.
യുപിഐ പ്ലാറ്റ്ഫോമില് പ്രവര്ത്തിക്കുന്ന ഇ- റുപ്പി ഡിപ്പാര്ട്ട്മെന്റ് ഫിനാന്ഷ്യല് സര്വീസ്, ആരോഗ്യമന്ത്രാലയം എന്നിവയുടെ സഹകരണത്തോടെയാണ് നാഷണല് പേയ്മെന്റ്സ് കോര്പ്പറേഷന് വികസിപ്പിച്ചത്.ക്യാഷ്ലെസ് ഇടപാടുകള് പ്രോത്സാഹിപ്പിക്കുന്നതിന്റെ ഭാഗമായാണ് പുതിയ സംവിധാനം. സര്ക്കാര് ആനുകൂല്യം ഗുണഭോക്താക്കളുടെ കൈകളില് നേരിട്ട് എത്തുന്നുണ്ട് എന്ന് ഉറപ്പാക്കുകയാണ് ഈ ഡിജിറ്റല് പേയ്മെന്റ് സംവിധാനത്തിലൂടെ സര്ക്കാര് ലക്ഷ്യമിടുന്നത്. സര്ക്കാര് ആനുകൂല്യങ്ങള് നേരിട്ട് കൈമാറുന്നത് കൂടുതല് കാര്യക്ഷമമാക്കാന് ഇത് വഴി സാധിക്കുമെന്ന് പ്രധാനമന്ത്രി നരേന്ദ്രമോദി പറഞ്ഞു.
ക്യൂആര് കോഡ്, എസ്എംഎസ് എന്നിവയെ അടിസ്ഥാനമാക്കിയാണ് ഇടപാടുകള് നടത്തുന്നത്. അക്കൗണ്ടില് പണം നിക്ഷേപിക്കുന്നതിന് പകരം ഗുണഭോക്താവിന്റെ മൊബൈലിലേക്ക് ഇ-വൗച്ചര് കൈമാറിയാണ് ഇടപാട് നടത്തുന്നത്. കൂപ്പണ് അയക്കുന്നതിന് മുന്പ് ഗുണഭോക്താവും മൊബൈല് നമ്പറും ശരിയാണ് എന്ന് ഉറപ്പാക്കിയ ശേഷമാണ് കൂപ്പണ് കൈമാറുന്നത്.
ഓണ്ലൈന് ബാങ്കിങ്ങോ മറ്റു പേയ്മെന്റ് ആപ്പുകളോ ഒന്നും ഇല്ലാതെ തന്നെ ഇടപാട് നടത്താന് ഇതുവഴി സാധിക്കും. ഗുണഭോക്താവിന് ഇലക്ട്രോണിക് വൗച്ചര് അല്ലെങ്കില് കൂപ്പണ് കൈമാറിയാണ് ഇടപാട് പൂര്ത്തിയാക്കുന്നത്. ലളിതമായി പറഞ്ഞാല് ക്യൂആര് കോഡ് അല്ലെങ്കില് എസ്എംഎസ് അടിസ്ഥാനമാക്കിയുള്ള ഇ- വൗച്ചര് എന്നിവ വഴിയാണ് ഇടപാട് പൂര്ത്തിയാക്കുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates