ബംഗളൂരു: നമ്പര്‍ പ്ലേറ്റ് ഇല്ലാതെ ഇരുചക്ര വാഹനം ഓടിച്ചത് ഭാരതീയ ന്യായ സംഹിത ( ബിഎന്‍എസ്) നിയമപ്രകാരം വഞ്ചനാക്കുറ്റം അല്ലെന്ന് കര്‍ണാടക ഹൈക്കോടതി. മോട്ടോര്‍ വാഹന നിയമത്തിന്റെ ലംഘനമായി മാത്രമേ കണക്കാക്കാനാകൂവെന്നും ജസ്റ്റിസ് അനന്ത് രാമനാഥ് ഹെഗ്ഡെ ഉത്തരവിട്ടു. പ്രതികള്‍ക്കെതിരെ ചുമത്തിയ വഞ്ചനാക്കുറ്റം കോടതി റദ്ദാക്കി.

പൊലീസ് ചുമത്തിയ വഞ്ചനാക്കുറ്റത്തിനെതിരെ വി ചന്നകേശവ, മകന്‍ ശരണ്‍ എന്നിവരാണ് കോടതിയെ സമീപിച്ചത്. നമ്പര്‍ പ്ലേറ്റ് ഇല്ലാത്ത വാഹനം ഓടിച്ചതിന് കാമാക്ഷിപാളയ പൊലീസാണ് ഇവര്‍ക്കെതിരെ വഞ്ചനാക്കേസ് രജിസ്റ്റര്‍ ചെയ്തത്. ഹെല്‍മറ്റ് ധരിക്കാതെ ബൈക്കില്‍ സഞ്ചരിച്ചതിന് ഇവര്‍ നേരത്തെ രണ്ടുതവണ പിഴയടച്ചിരുന്നു. വീണ്ടും പിഴ വരുന്നത് ഒഴിവാക്കാനാണ് ബൈക്കിന്റെ നമ്പര്‍ പ്ലേറ്റ് നീക്കം ചെയ്തതെന്ന് പ്രോസിക്യൂഷന്‍ വാദിച്ചു.

എന്നാല്‍ ഭാരതീയ ന്യായ സംഹിത, 2023 (BNS)ലെ സെക്ഷന്‍ 318(2) പ്രകാരമുള്ള കുറ്റം പ്രതികള്‍ക്കെതിരെ നിലനില്‍ക്കില്ലെന്ന് കോടതി നിരീക്ഷിച്ചു. വഞ്ചനാക്കുറ്റത്തിനുള്ള ശിക്ഷയാണ് ഈ വകുപ്പ് അനുശാസിക്കുന്നത്. ഹെല്‍മറ്റ് ധരിക്കാതെ വാഹനം ഓടിച്ച് വീണ്ടും നിയമലംഘനം നടത്തിയതിന്, മോട്ടോര്‍ വാഹന നിയമത്തിലെ 177-ാം വകുപ്പ് പ്രകാരം 1,500 രൂപ പിഴയടയ്ക്കാന്‍ കോടതി നിര്‍ദേശിച്ചു. പിഴ അടച്ച രസീത് കോടതിയില്‍ സമര്‍പ്പിക്കാനും കോടതി ഉത്തരവിട്ടിട്ടുണ്ട്.