ന്യൂഡല്‍ഹി: സാമ്പത്തികമായി പിന്നാക്കം നില്‍ക്കുന്നവര്‍ക്ക് സര്‍ക്കാര്‍ ജോലിയിലും വിദ്യാഭ്യാസ സ്ഥാപനങ്ങളിലും പത്തു ശതമാനം സംവരണം ഏര്‍പ്പെടുത്തിയ കേന്ദ്ര നടപടിയുടെ ഭരണഘടനാ സാധുത സുപ്രീം കോടതി പരിശോധിക്കും. ചീഫ് ജസ്റ്റിസ് യുയു ലളിതിന്റെ നേതൃത്വത്തിലുള്ള അഞ്ചംഗ ഭരണഘടനാ ബെഞ്ച് സെപ്റ്റംബര്‍ 13 മുതല്‍ കേസില്‍ വാദം കേള്‍ക്കുമെന്ന് സുപ്രീം കോടതി അറിയിച്ചു.
ചീഫ് ജസ്റ്റിസിനെക്കൂടാതെ ജസ്റ്റിസുമാരായ ദിനേശ് മഹേശ്വരി, എസ് രവീന്ദ്ര ഭട്ട്, ബേല എം ത്രിവേദി, ജെബി പര്‍ദിവാല എന്നിവരാണ് ബെഞ്ചിലെ അംഗങ്ങള്‍. പരിഗണിക്കേണ്ട വിഷയങ്ങള്‍ എന്തൊക്കെയന്ന് സെപ്റ്റംബര്‍ ആറിനു തീരുമാനിക്കുന്ന ബെഞ്ച് 13 മുതല്‍ വാദം കേള്‍ക്കും.
2019ല്‍ ഭരണഘടനാ ഭേദഗതിയിലൂടെ സാമ്പത്തികമായി പിന്നാക്കം നില്‍ക്കുന്നവര്‍ക്കു സംവരണം ഏര്‍പ്പെടുത്താന്‍ കേന്ദ്ര സര്‍ക്കാര്‍ തീരുമാനിച്ചത്.
മുസ്ലിം സംവരണം റദ്ദാക്കിയ ആന്ധ്ര ഹൈക്കോടതി വിധിക്ക് എതിരായ അപ്പീലുകള്‍, സാമ്പത്തിക സംവരണക്കേസ് തീര്‍പ്പാക്കിയതിനു ശേഷമേ പരിഗണിക്കൂ എന്ന് സുപ്രീം കോടതി വ്യക്തമാക്കി. മുസ്ലിംകള്‍ക്കു ജോലിയിലും വിദ്യാഭ്യാസ സ്ഥാപനങ്ങളിലെ പ്രവേശനത്തിനും സംവരണം ഏര്‍പ്പെടുത്തിയ ആന്ധ്ര സര്‍ക്കാരിന്റെ നടപടി ഹൈക്കോടതിയുടെ അഞ്ചംഗ ബെഞ്ചാണ് റദ്ദാക്കിയത്. നിയമം ഭരണഘടനാ വിരുദ്ധമെന്നു ചൂണ്ടിക്കാട്ടിയായിരുന്നു നടപടി. ഇതിനെതിരെ സംസ്ഥാന സര്‍ക്കാരിന്റേത് അടക്കം പത്തൊന്‍പത് അപ്പീലുകളാണ് സുപ്രീം കോടതിയില്‍ സമര്‍പ്പിക്കപ്പെട്ടത്.
പരസ്പരം ബന്ധപ്പെട്ട വിഷയങ്ങള്‍ ആയതിനാല്‍ സാമ്പത്തിക സംവരണത്തിനെതിരായ ഹര്‍ജികള്‍ ആദ്യം പരിഗണിക്കുമെന്ന് സുപ്രീം കോടതി ഭരണഘടനാ ബെഞ്ച് അറിയിച്ചു.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates