ചെന്നൈ: നടന്‍ വിജയ് യുടെ രാഷ്ട്രീയ പ്രവേശനത്തില്‍ ആശംസകള്‍ അറിയിച്ച് തമിഴ്‌നാട് ഉപമുഖ്യമന്ത്രി ഉദയനിധി സ്റ്റാലിന്‍. കുട്ടിക്കാലം മുതല്‍ വിജയ് യെ അറിയാമെന്നും അടുത്ത സുഹൃത്താണ് എന്നും ഉദയനിധി സ്റ്റാലിന്‍ പറഞ്ഞു. രാഷ്ട്രീയ പ്രവേശനത്തില്‍ ഉദയനിധി സ്റ്റാലിന്‍ വിജയം ആശംസിച്ചു.

വിജയം വര്‍ഷങ്ങളായുള്ള സുഹൃത്താണ്. കുട്ടിക്കാലം മുതല്‍ എനിക്ക് അദ്ദേഹത്തെ അറിയാം. എന്റെ പ്രൊഡക്ഷന്‍ ഹൗസിന്റെ ആദ്യ സിനിമ തന്നെ അദ്ദേഹത്തെ നായകനാക്കിയുള്ളതായിരുന്നു. അദ്ദേഹം അടുത്ത സുഹൃത്താണ്. പുതിയ തുടക്കത്തിന് അദ്ദേഹത്തിന് ആശംസ അറിയിക്കുന്നു. ഉദയനിധി പറഞ്ഞു.

ഞാന്‍ രാഷ്ട്രീയത്തില്‍ കുട്ടിയായിരിക്കും പക്ഷേ പേടിയില്ല; എല്ലാവരും സമന്മാര്‍: ആഞ്ഞടിച്ച് വിജയ്

വിജയ് യുടെ പാര്‍ട്ടി തമിഴക വെട്രി കഴകത്തിന്റെ ആദ്യ സംസ്ഥാന സമ്മേളനത്തില്‍ വന്‍ ജനപങ്കാളിത്തമാണ് ഉണ്ടായത്. രണ്ട് ലക്ഷത്തോളം പേരാണ് പങ്കെടുത്തത്. അതിനിടെ പാര്‍ട്ടി നയം പ്രഖ്യാപിച്ചുകൊണ്ടുള്ള വിജയ് യുടെ പ്രസംഗത്തില്‍ ഡിഎംകെയ്‌ക്കെതിരെ രൂക്ഷ വിമര്‍ശനമാണ് നടത്തിയത്. ദ്രാവിഡ മോഡല്‍ പറഞ്ഞ് ജനത്തെ വഞ്ചിക്കുന്നു. തമിഴ്‌നാടിനെ കൊള്ളയടിക്കുന്ന കുടുംബമാണ് ഡിഎംകെയെന്നും വിമര്‍ശനം. ആരുടേയും പേര് പറഞ്ഞ് വിമര്‍ശിക്കാത്തത് പേടികൊണ്ടല്ലെന്നും ആരെയും മോശക്കാരരാക്കേണ്ട എന്നു കരുതിയാണെന്നും താരം പറഞ്ഞു. അടുത്ത തെരഞ്ഞെടുപ്പില്‍ അഴിമതിക്കാരെ താഴെയിറക്കി അധികാരത്തിലേറുമെന്നും വിജയ് കൂട്ടിച്ചേര്‍ത്തു.