ഗുവഹാത്തി: കോണ്‍ഗ്രസ് എംപി റാഖിബുള്‍ ഹൂസൈനെ ഒരുസംഘം ആളുകള്‍ ക്രിക്കറ്റ് ബാറ്റുകൊണ്ട് മര്‍ദിച്ചു. മുഖംമൂടി ധരിച്ചെത്തിയ സംഘത്തിന്റെ ആക്രമണത്തില്‍ എംപിക്ക് പരിക്കേറ്റു. പാര്‍ട്ടി യോഗത്തിന് പോകുന്നതിനിടെയായിരുന്നു ആക്രമണം. സംഭവത്തിന്റെ വീഡിയോ സാമൂഹിക മാധ്യമങ്ങളില്‍ വ്യാപകമായി പ്രചരിച്ചു.

അദ്ദേഹത്തിന്റെ സുരക്ഷാ ഉദ്യോഗസ്ഥരാണ് മൂഖം മൂടി സംഘത്തിന്റെ ആക്രമണത്തില്‍ നിന്ന് അദ്ദേഹത്തെ രക്ഷിച്ചത്. ഇരുചക്രവാഹനത്തിലായിരുന്നു അദ്ദേഹം യോഗത്തിന് പോയത്, ആക്രമികളില്‍ ഒരാള്‍ എംപിയെ ക്രിക്കറ്റ് ബാറ്റുകൊണ്ട് മര്‍ദിച്ച ശേഷം ഓടിപ്പോകുന്നത് ദൃശ്യമങ്ങളില്‍ കാണാം. അതിനിടെ മറ്റുള്ളവര്‍ അദ്ദേഹത്തെ ആക്രമിക്കുകയും ചെയ്യുന്നതും വീഡിയോയില്‍ കാണാം.

'ആയുധങ്ങള്‍ ഏഴ് ദിവസത്തിനകം അടിയറവയ്ക്കണം'; അന്ത്യശാസനവുമായി മണിപ്പൂര്‍ ഗവര്‍ണര്‍

ആരാണ് ആക്രമണത്തിന് പിന്നിലെന്നും എന്താണ് കാരണമെന്നും കണ്ടെത്താനായിട്ടില്ല. സംഭവത്തില്‍ കോണ്‍ഗ്രസ് അന്വേഷണം ആവശ്യപ്പെട്ടു. അന്വേഷണം ആരംഭിച്ചതായി പൊലീസ് അറിയിച്ചു. സംഭവത്തിന് പിന്നാലെ ഭരണകക്ഷിയായ ബിജെപിക്കെതിരെ കോണ്‍ഗ്രസ് രംഗത്തുവന്നു. സംസ്ഥാനത്ത് ഒരു എംപി പോലും സുരക്ഷിതനല്ലെന്നതാണ് ഈ സംഭവം വ്യക്തമാക്കുന്നത് പ്രതിപക്ഷ നേതാവ് ദേബബ്രത പറഞ്ഞു.

ആള്‍ക്കൂട്ടം അദ്ദേഹത്തെ ആക്രമിക്കുകയായിരുന്നെന്ന് അസം ഡിജിപി ഹര്‍മീത് സിങ് പറഞ്ഞു. സുരക്ഷാ ഉദ്യേഗസ്ഥര്‍ അദ്ദേഹത്തെ രക്ഷിച്ചെന്നും അദ്ദേഹം സുരക്ഷിതനാണെന്നും ആക്രമണത്തില്‍ രണ്ട് സുരക്ഷാ ഉദ്യോഗസ്ഥര്‍ക്ക് പരിക്കേറ്റതായും അദ്ദേഹം പറഞ്ഞു. കഴിഞ്ഞ ലോക്‌സഭാ തെരഞ്ഞെടുപ്പില്‍ ദുബ്രിയില്‍ നിന്ന് പത്ത് ലക്ഷത്തിലധികം വോട്ടുകളുടെ റെക്കോര്‍ഡ് ഭൂരിപക്ഷത്തിനാണ് അദ്ദേഹം തെരഞ്ഞെടുക്കപ്പെട്ടത്.