ചെന്നൈ: കരൂര്‍ ദുരന്തത്തിന് പിന്നാലെ കേന്ദ്ര ആഭ്യന്തരമന്ത്രി അമിത് ഷായോട് സംസാരിക്കാന്‍ വിസമ്മതിച്ച് ടിവികെ അധ്യക്ഷനും നടനുമായ വിജയ്. കേന്ദ്ര ആഭ്യന്തര മന്ത്രിയുടെ ഓഫിസില്‍ നിന്നെത്തിയ ഫോണ്‍ കോളിനോടാണ് വിജയ് മുഖം തിരിച്ചത്. ദുരന്തത്തിന്റെ പിറ്റേന്നായിരുന്നു അമിത് ഷായുടെ ഓഫിസില്‍ നിന്ന് വിജയ്യെ ബന്ധപ്പെടാന്‍ ശ്രമിച്ചത്. എന്നാല്‍ സംസാരിക്കാന്‍ താത്പര്യമില്ലെന്ന് വിജയ് പറഞ്ഞുവെന്നാണ് റിപ്പോര്‍ട്ട്.

അതിനിടെ വിജയ് തന്റെ സംസ്ഥാന പര്യടനം മാറ്റിവച്ചു. ഔദ്യോഗിക എക്‌സ് അക്കൗണ്ടിലൂടെയാണ് ടിവികെ വിജയ്യുടെ സംസ്ഥാന പര്യടനം മാറ്റിയതായി അറിയിച്ചത്. അടുത്ത രണ്ടാഴ്ചത്തെ പരിപാടികളാണ് മാറ്റിയത്. തത്കാലത്തേക്കാണ് നടപടി.

കരൂരില്‍ ദുരന്തം നടന്ന ദിവസത്തെ പരിപാടിയുടെ മുഴുവന്‍ വിഡിയോ ദൃശ്യങ്ങള്‍ ഹാജരാക്കാന്‍ ആവശ്യപ്പെട്ട് ടിവികെ നേതാക്കള്‍ക്ക് പൊലീസ് നോട്ടിസ് നല്‍കി. ജോയിന്റ് സെക്രട്ടറി നിര്‍മല്‍ കുമാറിനാണ് നോട്ടിസ് അയച്ചിരിക്കുന്നത്. കരൂരിലെ ടിവികെ റാലിയില്‍ തിക്കിലും തിരക്കിലുംപെട്ട് 41 പേര്‍ക്ക് ജീവന്‍ നഷ്ടപ്പെട്ടിരുന്നു.