ചെന്നൈ: തമിഴ് ടെലിവിഷന്‍ താരം വി ജെ ചിത്രയുടെ മരണം ആത്മഹത്യയെന്ന് പൊലീസ്. പോസ്റ്റ്‌മോര്‍ട്ടം നടത്തിയ ഡോക്ടര്‍മാര്‍ നടിയുടെ മരണം ആത്മഹത്യയാണെന്ന് പറഞ്ഞതായി പൊലീസുകാര്‍ പറയുന്നു. ചിത്രയുടെ മരണത്തില്‍ ഭര്‍ത്താവ് ഹേമന്ദിനെതിരെ കുടുംബാംഗങ്ങള്‍ ആരോപണമുന്നയിച്ചതിന് പിന്നാലെയായിരുന്നു പൊലീസ് ഉദ്യോഗസ്ഥരുടെ പ്രതികരണം.

ഹേമന്ദ് മകളെ കൊന്നതാണെന്ന് ചിത്രയുടെ അമ്മ ആരോപിച്ചു. ഹേമന്ദിനെ വെറുതെ വിടരുത്. മറ്റാര്‍ക്കും ഇങ്ങനെ സംഭവിക്കരുത്. മകള്‍ ആത്മഹത്യ ചെയ്യില്ല. മറ്റുള്ളവര്‍ ആത്മഹത്യയെ കുറിച്ച് പറയുമ്പോള്‍ തന്നെ അവരെ ഉപദേശിക്കുന്നതാണ് മകളുടെ രീതി. കരുത്തോടെ ഇരിക്കാനാണ് എല്ലാവര്‍ക്കും മകള്‍ നല്‍കാറുള്ള ഉപദേശം. മകളെ മര്‍ദ്ദിച്ച് കൊന്നതാണെന്നും അമ്മ ആരോപിച്ചു.

കഴിഞ്ഞ ദിവസമാണ് ചെന്നൈ നസ്രത്ത്‌പേട്ടിലെ ഹോട്ടല്‍മുറിയില്‍ ചിത്രയെ തൂങ്ങിമരിച്ച നിലയില്‍ കണ്ടെത്തിയത്. ഹേമന്ദിനൊപ്പമാണ് ചിത്ര ഹോട്ടലില്‍ താമസിച്ചിരുന്നത്. മാസങ്ങള്‍ക്ക് മുമ്പായിരുന്നു ഇവരുടെ വിവാഹനിശ്ചയം. ചിത്ര ആത്മഹത്യ ചെയ്യാനുള്ള കാരണങ്ങള്‍ ദുരൂഹമായി തുടരുകയാണ്. പൊലീസ് ഇക്കാര്യം അന്വേഷിച്ച് വരികയാണെന്നാണ് റിപ്പോര്‍ട്ടുകള്‍.