വാഷിങ്ടന്‍: ഇന്ത്യക്ക് മേല്‍ ഇരട്ടത്തീരുവ ചുമത്തിയ യുഎസ് പ്രസിഡന്റ് ഡോണള്‍ഡ് ട്രംപിന്റെ നടപടിക്കെതിരെ വിമര്‍ശനം ശക്തമാകുന്നു. നടപടിയെ രൂക്ഷമായി വിമര്‍ശിച്ച് മുന്‍ ദേശീയ സുരക്ഷാ ഉപദേഷ്ടാവ് ജേക്ക് സുള്ളിവന്‍ രംഗത്തെത്തി. 'വ്യാപാര ആക്രമണം' എന്നാണ് ജേക്ക് സുള്ളിവന്‍ ട്രംപിന്റെ നടപടിയെ വിശേഷിപ്പിച്ചത്.

ഇന്ത്യ യുഎസ് ബന്ധത്തില്‍ വിള്ളല്‍ വീഴ്ത്തുന്ന നടപടിയാണ് ട്രംപിന്റെ താരിഫ് നിരക്കുകള്‍. വര്‍ഷങ്ങളുടെ പ്രയത്‌നത്തിന്റെ ഫലമായി പടുത്തുയര്‍ത്തിയ ഇന്ത്യ യുഎസ് ബന്ധത്തെ പിറകോട്ടടിപ്പിക്കുന്നതാണ് താരിഫ് നടപടി. അമിതമായ താരിഫ് ഏര്‍പ്പെടുത്തിയതിലൂടെ ഇന്ത്യയെ ചൈനയുമായി അടുപ്പിക്കുകയാണ് ട്രംപ് ചെയ്തതെന്നും ജേക്ക് സുള്ളിവന്‍ പറഞ്ഞു.

ലോക രാഷ്ട്രങ്ങള്‍ക്ക് മുന്നില്‍ യുഎസിന്റെ വിശ്വാസ്യത തകര്‍ക്കുന്നതാണ്. അമേരിക്കെയെ മറ്റ് രാജ്യങ്ങള്‍ വിശ്വസ്തതയോടെ കണ്ട കാലമുണ്ടായിരുന്നു. ഇന്ന് വിശ്വസിക്കാന്‍ കൊള്ളാത്ത രാജ്യമായും തടസ്സക്കാരനുമായാണ് മറ്റുള്ളവര്‍ കാണുന്നത്. ചൈന പോലും വിശ്വാസ്യത നേടുന്ന കാലത്താണ് യുഎസിന്റെ പിന്തിരിപ്പന്‍ നിലപാട് എന്നും സുള്ളിവന്‍ കുറ്റപ്പെടുത്തുന്നു. ആഗോള വിപണിയില്‍ യുഎസിന്റെ ബ്രാന്‍ഡ് മൂല്യം ഇടിഞ്ഞെന്നും അദ്ദേഹം ചൂണ്ടിക്കാട്ടി.