ന്യൂഡല്‍ഹി: കുല്‍ഭൂഷണ്‍ ജാദവ് കേസില്‍ പാക്കിസ്ഥാനെതിരായി അന്താരാഷ്ട്ര കോടതിയില്‍ വാദിക്കുന്നതിനുവേണ്ടി മുന്‍ സോളിസിറ്റര്‍ ജനറലും വിലകൂടിയ അഭിഭാഷകനുമായ ഹരീഷ് സാല്‍വെ പ്രതിഫലത്തുകയായി വാങ്ങുന്നത് ഒരു രൂപയാണെന്ന് സുഷമാ സ്വരാജ് ട്വീറ്റ് ചെയ്തു.
മറ്റേതെങ്കിലും നല്ല വക്കീല്‍ ചെയ്യുന്നതിലപ്പുറമൊന്നും ചെയ്യാന്‍ ഈ വിലകൂടിയ വക്കീലിനെക്കൊണ്ട് സാധിക്കില്ലെന്ന് ഒരാള്‍ ട്വീറ്റ് ചെയ്തതിന് മറുപടിയായിട്ടായിരുന്നു സുഷമസ്വരാജ് ട്വിറ്ററില്‍ ഹരീഷ് സാല്‍വെയുടെ പ്രതിഫലം കുറിച്ചത്.
കുല്‍ഭൂഷണ്‍ ജാദവിന് നീതി ലഭിക്കുമെന്നുതന്നെയാണ് കേന്ദ്രത്തിന്റെ പ്രതീക്ഷ. ഏതെങ്കിലും തരത്തിലുള്ള ഭീകരപ്രവര്‍ത്തനത്തില്‍ കുല്‍ഭൂഷണ്‍ ജാദവ് പങ്കെടുത്തതായി പാക്കിസ്ഥാന് സ്ഥാപിച്ചെടുക്കാന്‍ സാധിച്ചിട്ടില്ലെന്നത് ഏറെ പ്രതീക്ഷ നല്‍കുന്നതായാണ് കേന്ദ്രസര്‍ക്കാര്‍ വക്താക്കള്‍ അറിയിക്കുന്നത്.