ന്യൂഡല്‍ഹി: ബിജെപി ദേശീയ പ്രസിഡന്റ് അമിത് ഷായ്ക്ക് വീണ്ടും മമത സര്‍ക്കാരിന്റെ വിലക്ക്. കൊല്‍ക്കത്തയിലെ ജാദവ്പൂര്‍ ജില്ലയില്‍ റോഡ് ഷോ നടത്തുന്നതില്‍ നിന്നുമാണ് അമിത് ഷായെ ബംഗാള്‍ സര്‍ക്കാര്‍ വിലക്കിയത്. ഇതിന് പുറമേ തെരഞ്ഞെടുപ്പ് പ്രചാരണത്തിന്റെ ഭാഗമായി വരുന്ന അമിത് ഷായുടെ ഹെലികോപ്റ്റര്‍ ലാന്‍ഡ് ചെയ്യുന്നതിനും വിലക്ക് ഏര്‍പ്പെടുത്തിയിട്ടുണ്ട്. നേരത്തെ ഹെലികോപ്റ്റര്‍ ഇറക്കുന്നതിന് അനുമതി നല്‍കിയിരുന്നു. എന്നാല്‍ അവസാനനിമിഷം ഇതിനും വിലക്ക് ഏര്‍പ്പെടുത്തുകയായിരുന്നു.

തെരഞ്ഞെടുപ്പിന്റെ അവസാനഘട്ടത്തിലാണ് ജാദവ് പൂര്‍ ഉള്‍പ്പെടെയുളള മണ്ഡലങ്ങള്‍ ജനവിധി തേടുന്നത്. ഇതിന്റെ ഭാഗമായി പ്രചാരണത്തിന് എത്തിയതാണ് അമിത് ഷാ. ഇത് ആദ്യമായിട്ടല്ല അമിത് ഷായുടെ തെരഞ്ഞെടുപ്പ് പ്രചാരണത്തിന് മമത സര്‍ക്കാര്‍ വിലക്ക് ഏര്‍പ്പെടുത്തുന്നത്. ജനുവരിയില്‍ റാലിയില്‍ പങ്കെടുക്കുന്നതിന് അമിത് ഷായുടെ ഹെലികോപ്റ്റര്‍ ലാന്‍ഡ് ചെയ്യുന്നതില്‍ നിന്നും മമത സര്‍ക്കാര്‍ വിലക്കിയിരുന്നു. മാല്‍ഡ ജില്ലയിലെ റാലിയില്‍ പങ്കൈടുക്കുന്നതിന്റെ ഭാഗമായി ബംഗാളില്‍ എത്തിയപ്പോഴാണ് വിലക്ക് ഏര്‍പ്പെടുത്തിയത്. ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിനും സമാനമായ രീതിയില്‍ വിലക്ക് ഏര്‍പ്പെടുത്തിയിട്ടുണ്ട്. ഇതിനെതിരെയെല്ലാം ശക്തമായ ഭാഷയിലാണ് ബിജെപി പ്രതികരിച്ചിരുന്നത്. ബംഗാളില്‍ തൃണമൂല്‍ കോണ്‍ഗ്രസും ബിജെപിയും തമ്മിലാണ് മുഖ്യമായി പോരാട്ടം നടക്കുന്നത്.