ഭോപ്പാല്: കുടുംബവഴക്കിനെ തുടര്ന്ന് ഭര്ത്താവിനെയും മൂന്ന് മക്കളെയും അര്ദ്ധരാത്രിയില് വീട്ടില് നിന്ന് ഇറക്കിവിട്ട് ഭാര്യ. അതിശൈത്യം സഹിക്കാന് കഴിയാതെ അച്ഛനും മക്കളും പൊലീസിന്റെ സഹായം തേടി. 15 ഉം 11 ഉം വയസ്സുളള പെണ്കുട്ടികള്ക്ക് ചൈല്ഡ് ലൈനിന്റെ കീഴിലുളള അഭയകേന്ദ്രത്തില് പൊലീസ് സംരക്ഷണം ഒരുക്കി. അച്ഛനും മകനും പൊലീസ് മറ്റൊരു സുരക്ഷിതമായ സ്ഥലം ഏര്പ്പെടുത്തി കൊടുത്തു.
മധ്യപ്രദേശിലെ ഭോപ്പാലിലാണ് സംഭവം. ദമ്പതികള് തമ്മിലുളള വഴക്കിനെ തുടര്ന്നാണ് ഭര്ത്താവിനെയും മൂന്ന് മക്കളെയും വീട്ടില് നിന്ന് ഇറക്കിവിട്ടതെന്ന് പൊലീസ് പറയുന്നു.തുടര്ന്ന് വീട് അകത്ത് നിന്ന് പൂട്ടി. വാതില് തുറക്കാന് ആവശ്യപ്പെട്ട് നിരവധി തവണ വാതിലില് മുട്ടിയെങ്കിലും അകത്ത് കയറ്റാന് ഭാര്യ അനുവദിച്ചില്ല. തുടര്ന്ന് ഭര്ത്താവും മക്കളും അശോക ഗാര്ഡന് പൊലീസ് സ്റ്റേഷനെ സമീപിക്കുകയായിരുന്നു.
ഫോണില് വിളിച്ച് അനുനയിപ്പിക്കാന് പൊലീസ് ശ്രമിച്ചെങ്കിലും ഭാര്യ വഴങ്ങിയില്ല. തുടര്ന്ന് പെണ്കുട്ടികള്ക്ക് രാത്രിയില് കഴിയാന് സുരക്ഷിത സ്ഥലം ഒരുക്കി തരാന് ഭര്ത്താവ് പൊലീസിനോട് ആവശ്യപ്പെടുകയായിരുന്നു. ഇതിന്റെ അടിസ്ഥാനത്തിലാണ് ഇവരെ അഭയകേന്ദ്രത്തിലാക്കിയത്.
രാത്രി ഒരു മണിയോടെയാണ് പെണ്കുട്ടികളെ ചൈല്ഡ് ലൈനിന്റെ കീഴിലുളള അഭയകേന്ദ്രത്തിലാക്കിയത്. ദമ്പതികള് തമ്മിലുളള വ്യക്തിപരമായ പ്രശ്നം ആയതുകൊണ്ട് പൊലീസ് ഇതുവരെ കേസെടുത്തിട്ടില്ല. ഇരുവര്ക്കും കൗണ്സിലിങ്ങ് നല്കി പ്രശ്നങ്ങള് രമ്യമായി പരിഹരിക്കുന്നതിന് വേണ്ടിയുളള നടപടികള് സ്വീകരിക്കുമെന്ന് പൊലീസ് പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates