ലഖ്‌നൗ:  മുന്‍ പ്രധാനമന്ത്രി ഇന്ദിര ഗാന്ധിയുടെ പ്രതിമയുടെ മുഖം കറുത്ത തുണിയുപയോഗിച്ച് മൂടി സാമൂഹിക വിരുദ്ധര്‍. ഉത്തര്‍പ്രദേശിലെ ലഖിംപുര്‍ ഖേരി ജില്ലയിലെ ഗോലയിലുള്ള പ്രതിമയിലാണ് സാമൂഹിക വിരുദ്ധര്‍ കറുത്ത തുണിയിട്ടത്. 

സംഭവത്തെ തുടര്‍ന്ന് കോണ്‍ഗ്രസ് പ്രവര്‍ത്തകര്‍ വന്‍ പ്രതിഷേധമാണ് നടത്തിയത്. മുതിര്‍ന്ന ജില്ലാ ഓഫീസര്‍മാര്‍ സ്ഥലത്തെത്തി പ്രതിമയുടെ മുഖത്ത് നിന്ന് തുണി മാറ്റി. സംഭവത്തെക്കുറിച്ച് അന്വേഷിക്കാന്‍ ജില്ലാ ഭരണകൂടം ഉത്തരവിട്ടിട്ടുണ്ട്. 

ഇന്ന് രാവിലെ പ്രഭാത സവാരിക്കിറങ്ങിയ ചിലരാണ് പ്രതിമയുടെ മുഖം കറുത്ത തുണി കൊണ്ടു മൂടിയ നിലയില്‍ കണ്ടെത്തിയത്. താമസിയാതെ തന്നെ കോണ്‍ഗ്രസ് പ്രവര്‍ത്തകര്‍ സംഭവ സ്ഥലത്തെത്തുകയും പ്രതിഷേധം ആരംഭിക്കുകയുമായിരുന്നു. സംഭവത്തെക്കുറിച്ച് വിശദമായി അന്വേഷണം നടത്തുകയാണെന്ന് മുതിര്‍ന്ന പൊലീസ് ഉദ്യോഗസ്ഥന്‍ വ്യക്തമാക്കി.