ന്യൂഡല്‍ഹി :  ഇന്ത്യയുടെ കിഴക്കന്‍ മേഖലകളില്‍ വന്‍ നാശം വിതച്ച ഉംപുണ്‍ ചുഴലിക്കാറ്റ് പിന്‍വാങ്ങുന്നതിന് പിന്നാലെ, രാജ്യത്ത് ഉഷ്ണതരംഗം ഉണ്ടാകുമെന്ന് മുന്നറിയിപ്പ്. ഉംപുണ്‍ പ്രഭാവത്തിലാണ് രാജ്യത്ത് ഉഷ്ണതരംഗത്തിന് വഴിയൊരുങ്ങിയത്. ആന്ധ്രപ്രദേശ്, തമിഴ്‌നാട്, പുതുച്ചേരി, വടക്കന്‍ കര്‍ണാടക എന്നിവിടങ്ങളില്‍ 48 ഡിഗ്രി വരെ താപനില ഉയര്‍ന്നേക്കാമെന്ന് കാലാവസ്ഥ വകുപ്പ് അധികൃതര്‍ മുന്നറിയിപ്പ് നല്‍കി.

ഡല്‍ഹിയില്‍ കനത്ത ചൂടാണ് അനുഭവപ്പെടുന്നത്. ഈ വര്‍ഷത്തെ ഏറ്റവും ഉയര്‍ന്ന ചൂടാണ് ഡല്‍ഹിയില്‍ ഇന്നലെ രേഖപ്പെടുത്തിയത്. പാലം മേഖലയില്‍ ഇന്നലെ രേഖപ്പെടുത്തിയത് 44.1 ഡിഗ്രി സെല്‍ഷ്യസാണ്. വിജയവാഡയില്‍ 46 ഡിഗ്രി സെല്‍ഷ്യസും താപനില രേഖപ്പെടുത്തി.

ദക്ഷിണേന്ത്യന്‍ സംസ്ഥാനങ്ങള്‍ക്ക് പുറമെ, മധ്യപ്രദേശ്,  ഉത്തര്‍പ്രദേശ്, രാജസ്ഥാന്‍ തുടങ്ങിയ സംസ്ഥാനങ്ങളിലും, രായലസീമ,മഹാരാഷ്ട്രയിലെ വിദര്‍ഭ, ഗുജറാത്തിലെ സൗരാഷ്ട്ര, കച്ച് മേഖലകളിലും ഉഷ്ണതരംഗം ഉണ്ടാകുമെന്നാണ് കാലാവസ്ഥ വിദഗ്ധരുടെ മുന്നറിയിപ്പ്.