ന്യൂഡല്‍ഹി: തെരഞ്ഞെടുപ്പിലേറ്റ കനത്ത തോല്‍വിയുടെ പശ്ചാതലത്തില്‍ എന്‍സിപി കോണ്‍ഗ്രസില്‍ ലയിച്ചേക്കുമെന്നുള്ള അഭ്യൂഹങ്ങള്‍ ശക്തമാക്കുന്നു. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി എന്‍സിപി അധ്യക്ഷന്‍ ശരദ് പവാറുമായി കഴിഞ്ഞ ദിവസം കൂടിക്കാഴ്ച നടത്തിയതാണ് അഭ്യൂഹങ്ങള്‍ പടരാന്‍ കാരണമായത്. ഡല്‍ഹിയിലെ പവാറിന്റെ വസതയിലെത്തിയ രാഹുല്‍, ഒരുമണിക്കൂറോളം അദ്ദേഹവുമായി ചര്‍ച്ചകള്‍ നടത്തി.
എന്നാല്‍ ലയന ചര്‍ച്ചകള്‍ നടത്തിയെന്നത് നിഷേധിച്ച് എന്‍സിപി നേതാക്കള്‍ രംഗത്തെത്തി. ഇതുവരെയും അത്തരത്തിലുള്ള ചര്‍ച്ചകള്‍ നടന്നിട്ടില്ലെന്നാണ് മുതിര്‍ന്ന നേതാക്കള്‍ പറയുന്നത്. എന്നാല്‍ ഒരുമിക്കാനുള്ള സാധ്യതകള്‍ പാര്‍ട്ടി നേതാക്കള്‍ പൂര്‍ണമായും തള്ളിക്കളഞ്ഞിട്ടുമില്ല.
രണ്ടുദിവസം കോണ്‍ഗ്രസ് നേതാക്കളെ പൂര്‍ണമായും ഒഴിവാക്കിയ രാഹുല്‍, തോല്‍വിയ്ക്ക് ശേഷം ആദ്യം ചര്‍ച്ച നടത്തുന്നത് ശരദ് പവാറുമായിട്ടാണെന്നുള്ളതും ശ്രദ്ധേയമാണ്.
രാഹുല്‍ ഗാന്ധിയുമായി ചര്‍ച്ച നടത്തിയ വിവരം എന്‍സിപി അധ്യക്ഷന്‍ ശരദ് പവാര്‍ ട്വിറ്ററിലൂടെ അറിയിച്ചു. വരുന്ന നിയമസഭ തെരഞ്ഞെടുപ്പിലേക്കുള്ള നീക്കങ്ങള്‍ ചര്‍ച്ച ചെയ്തുവെന്നാണ് പവാര്‍ ട്വീറ്റ് ചെയ്തിരിക്കുന്നത്.
എന്‍സിപി-കോണ്‍ഗ്രസ് ലയനത്തെക്കുറിച്ച് താന്‍ നേരത്തെ സൂചിപ്പിച്ചിരുന്നുവെന്ന് എന്‍സിപി വിട്ട് കോണ്‍ഗ്രസില്‍ ചേര്‍ന്ന താരിഖ് അന്‍വര്‍ പ്രതികരിച്ചു. മറ്റ് നേതാക്കളുമായി താന്‍ സംസാരിക്കാം എന്നായിരുന്നു അന്ന് പവാര്‍ മറുപടി നല്‍കിയത് എന്നും അദ്ദേഹം വ്യക്തമാക്കി.
ലോക്‌സഭ തെരഞ്ഞെടുപ്പില്‍ മഹാരാഷ്ട്രയില്‍ എന്‍സിപി-കോണ്‍ഗ്രസ് സഖ്യത്തിന് വലിയ പരാജയം ഏറ്റുവാങ്ങേണ്ടിവന്നിരുന്നു. 48 സീറ്റുകളില്‍ 41ലും ബിജെപി-ശിവസേന സഖ്യം വിജയിച്ചു. എന്‍സിപിക്ക് നാല് സീറ്റ് ലഭിച്ചപ്പോള്‍ കോണ്‍ഗ്രസ് ഒരു സീറ്റിലേക്ക് ഒതുങ്ങി.
പ്രതിപക്ഷ നേതൃസ്ഥാനം ലഭിക്കണമെങ്കില്‍ ആകെ അംഗസംഖ്യയുടെ പത്ത് ശതമാനം അംഗങ്ങളെങ്കിലും വേണം. അതു പ്രകാരം ആവശ്യമായ അംഗങ്ങളുടെ എണ്ണം 54 ആണ്. കോണ്‍ഗ്രസിനുള്ളത് 52 അംഗങ്ങളാണ്. എന്‍സിപിയുടെ അഞ്ച് എംപിമാര്‍കൂടി ചേര്‍ന്നാല്‍ കോണ്‍ഗ്രസിന് പ്രതിപക്ഷ സ്ഥാനം ലഭിക്കും. ഈ സാഹചര്യത്തിലാണ് ഇരു പാര്‍ട്ടികളും തമ്മിലുള്ള ലയന ചര്‍ച്ചകള്‍ക്ക് തുടങ്ങിയതെന്നാണ് വിലയിരുത്തല്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates