റാഞ്ചി: മന്ത്രവാദി എന്ന് സംശയിച്ച് 55കാരിയെ ഗ്രാമത്തിലൂടെ നിര്‍ബന്ധിച്ച് നടത്തിച്ച് അപമാനിച്ചതായി പരാതി. സ്ത്രീയുടെ പരാതിയില്‍ ആറ് സ്ത്രീകള്‍ ഉള്‍പ്പെടെ ഒന്‍പത് പേരെ അറസ്റ്റ് ചെയ്തു.

ഝാര്‍ഖണ്ഡിലെ സിംദേഗ ജില്ലയിലാണ് സംഭവം. ഗ്രാമ പുരോഹിതന്റെ നേതൃത്വത്തില്‍ കൊമ്പാകേര ഗഞ്ചുതോലി ഗ്രാമത്തിലെ ഗ്രാമവാസികള്‍ യോഗം ചേര്‍ന്നാണ് 55 കാരിയെ മന്ത്രവാദിയായി ചിത്രീകരിച്ചത്. 

ഒരു മാസം മുന്‍പ് ആണ്‍കുട്ടി മരിച്ചത് ഇവര്‍ മന്ത്രവാദം നടത്തിയത് കൊണ്ടാണ് എന്ന് ഗ്രാമവാസികള്‍ ആരോപിച്ചു. കുപിതരായ സ്ത്രീകള്‍ 55കാരിയെ ശിക്ഷിക്കാന്‍ തീരുമാനിക്കുകയായിരുന്നുവെന്ന് പൊലീസ് പറയുന്നു.

55കാരിയുടെ മുടി മുറിച്ച ശേഷമാണ് നടത്തിച്ചത്. തുടക്കത്തില്‍ ഗ്രാമവാസികളുടെ രോഷത്തിന് വിധേയമാകേണ്ടി വരുമെന്ന് കരുതി പ്രതികരിച്ചില്ല. തുടര്‍ന്ന് വിവരം അറിഞ്ഞ് സ്ഥലത്തെത്തിയ പൊലീസുകാര്‍ക്ക് സ്ത്രീ പരാതി നല്‍കുകയായിരുന്നു. പരാതിയുടെ അടിസ്ഥാനത്തില്‍ 49 പേര്‍ക്കെതിരെയാണ് കേസെടുത്തിരിക്കുന്നത്. ഇതില്‍ 9 പേരെ അറസ്റ്റ് ചെയ്തായി പൊലീസ് അറിയിച്ചു.