ചെന്നൈ: മൊബൈല്‍ ഷോപ്പില്‍ സ്മാര്‍ട്ട്‌ഫോണ്‍ മോഷ്ടിക്കാനെത്തിയ കള്ളന് കുടുക്കായത് സ്വന്തം ഫോണ്‍. പുത്തന്‍ സ്മാര്‍ട്ട്‌ഫോണുമായി കടക്കുന്നതിനിടയില്‍ കടയില്‍ സ്വന്തം ഫോണ്‍ മറന്നുവച്ചതാണ് മോഷ്ടാവിന് വിനയായത്. തൊണ്ടിയാര്‍പേട്ടിലെ മൊബൈല്‍ ഷോപ്പിലാണ് സംഭവം
കടയുടെ ഷട്ടര്‍ തുറക്കുന്ന ശബ്ദം കേട്ടാണ് കടയുടമ ജാനകിരാമന്‍ ഉണര്‍ന്നത്. പുലര്‍ച്ചെ മൂന്ന് മണിയോടെയായിരുന്നു മോഷണശ്രമം നടന്നത്. ജാനകിരാമന്‍ എത്തി നോക്കുമ്പോഴേക്കും കള്ളന് കടന്നുകളഞ്ഞിരുന്നു. കുത്തിതുറന്ന നിലയിലായിരുന്നു കട. പരിശോധിക്കുന്നതിനിടയില്‍ പുതിയതായി അവതരിപ്പിച്ച ഒരു ആന്‍ഡ്രോയിഡ് ഫോണ്‍ കടയില്‍ നിന്ന് മോഷണം പോയതായി കണ്ടെത്തി. ഇതോടൊപ്പം ഒരു പഴയ മൊബൈല്‍ തറയില്‍ വീണുകിടക്കുന്നതും ഇയാളുടെ ശ്രദ്ധയിപ്പെട്ടു.
കടയുടമ വിവരമറിയച്ചതിനെത്തുടര്‍ന്ന് സ്ഥലത്തെത്തിയ പൊലീസ് കടയില്‍ പരിശോധന നടത്തി. പണമോ മറ്റ് വസ്തുക്കളോ മോഷ്ടിക്കപ്പെട്ടിട്ടില്ല. സിസിടിവി ദൃശ്യങ്ങളുടെയും കടയില്‍ നിന്നു ലഭിച്ച മൊബൈലിന്റെയും സഹായത്തോടെ കള്ളനായുള്ള അന്വേഷണം ആരംഭിച്ചിരിക്കുകയാണ് പൊലീസ്. കടയുടമ വരുന്ന ശബ്ദം കേട്ട് കള്ളന് തിടുക്കത്തില്‍ കടന്നുകളഞ്ഞതാകാമെന്നും അതിനിടയില്‍ ഫോണ്‍ മറന്നിരിക്കാമെന്നുമാണ് പൊലീസ് നിഗമനം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates