ന്യൂഡല്‍ഹി:പരിശീലന പറക്കലിനിടെ തകര്‍ന്നുവീണ സുഖോയ് വിമാനത്തിലുണ്ടായിരുന്ന രണ്ട് പൈലറ്റുമാരുടെ മൃതദേഹം കണ്ടെത്തി. മലയാളി പൈലറ്റായ കോഴിക്കോട് സ്വദേശി അച്ചു, ദിവേശ് പങ്കജ് എന്നിവരുടെ മൃതദേഹങ്ങളാണ് കണ്ടെത്തിയത്. 

വിമാനം തകര്‍ന്നുവീണ അരുണാചല്‍-അസാം അതിര്‍ത്തിയില്‍ നിന്നാണ് ഇവരുടെ മൃതദേഹങ്ങള്‍ കണ്ടെത്തിയിരിക്കുന്നത്. പൈലറ്റുമാരുടെ രക്തത്തില്‍ കുതിര്‍ന്ന ഷൂവും, പേഴ്‌സും ഉള്‍പ്പെടെയുള്ളവ വിമാനാവശിഷ്ടങ്ങള്‍ക്കിടയില്‍ നിന്നും ചൊവ്വാഴ്ച കണ്ടെത്തിയിരുന്നു. 

മെയ് 23ന് തെസ്പൂരില്‍ നിന്നും പറന്നുയര്‍ന്ന സുഖോയ്-30മായുള്ള റഡാര്‍ ബന്ധം നഷ്ടപ്പെടുകയായിരുന്നു. മെയ് 26ന് അസാമിലെ തെസ്പൂരില്‍ നിന്നും 60 കിലോമീറ്റര്‍ അകലെ ഉള്‍വനത്തില്‍ തകര്‍ന്ന വിമാനത്തിന്റെ അവശിഷ്ടങ്ങള്‍ കണ്ടെത്തി. എന്നാല്‍ വിമാനത്തിലുണ്ടായിരുന്ന രണ്ട് പൈലറ്റുമാരെ കുറിച്ച് വിവരമുണ്ടായിരുന്നില്ല.