ലഖ്‌നോ: മഹാത്മഗാന്ധിയുടെ ഘാതകന്‍ നാഥുറാം വിനായക് ഗോഡ്‌സേ രാജ്യസ്‌നേഹിയാണെന്ന് ഭോപ്പാലിലെ ബിജെപി സ്ഥാനാര്‍ത്ഥി പ്രജ്ഞാ സിംഗ് ഠാക്കൂര്‍. ഗോഡ്‌സേ തീവ്രവാദിയാണെന്ന പറയുന്നവര്‍ ആത്മപരിശോധന നടത്തണമെന്നും  പ്രജ്ഞ പറഞ്ഞു. ഗോഡ്‌സേ ഹിന്ദു തീവ്രവാദിയാണെന്ന കമല്‍ഹാസന്റെ പരാമര്‍ശത്തിനാണ് പ്രജ്ഞാ ഠാക്കൂറിന്റെ മറുപടി.

ഗോഡ്‌സെയെ ഭീകരനെന്ന് വിളിക്കുന്നവര്‍ക്ക് തെരഞ്ഞടുപ്പില്‍ ജനം ഉചിതമായ മറുപടി നല്‍കുമെന്നും പ്രജ്ഞാ സിംഗ് പറഞ്ഞു. സ്വതന്ത്ര്യ ഇന്ത്യയിലെ ആദ്യ ഹിന്ദു തീവ്രവാദി നാഥുറാം ഗോഡ്‌സെ ആണെന്ന കമല്‍ഹാസന്റെ പരാമര്‍ശത്തിനെതിരെ ബിജെപി രംഗത്തെത്തിയിരുന്നു. ഹിന്ദു മുന്നണി പ്രവര്‍ത്തകര്‍ വിവിധ പൊലീസ് സ്‌റ്റേഷനുകളില്‍ കമല്‍ഹാസനെതിരെ പരാതി നല്‍കുകയും ചെയ്തിരുന്നു. എന്നാല്‍ തന്റെ പരാമര്‍ശത്തില്‍ താന്‍ ഉറച്ചുനില്‍ക്കുകയാണെന്ന് കമല്‍ ആവര്‍ത്തിച്ചു.

താന്‍ ചരിത്രസത്യം മാത്രമാണ് പറഞ്ഞത്. ഹിന്ദു മതത്തെ വ്രണപ്പെടുത്തുന്ന ഒന്നും പറഞ്ഞിട്ടില്ലെന്നും തന്റെ വാക്കുകളെ വളച്ചൊടിച്ച മാധ്യമങ്ങളാണ് തെറ്റുകാര്‍,
ഗാന്ധിയെ കൊന്ന നാഥുറാം ഗോഡ്‌സെയാണ് ആ തീവ്രവാദി. അവിടെ നിന്നാണ് പ്രശ്‌നങ്ങളുടെയെല്ലാം തുടക്കമെന്നും കമല്‍ പറഞ്ഞു