ഭോപ്പാല്‍:   ജീവനക്കാരന് കോവിഡ് സ്ഥിരീകരിച്ചതോടെ, മധ്യപ്രദേശിലെ പൊലീസ് ആസ്ഥാനം അടച്ചുപൂട്ടി. പൊലീസ് ആസ്ഥാനം സ്ഥിതി ചെയ്യുന്ന ഭോപ്പാലില്‍ 29 പൊലീസ് ഉദ്യോഗസ്ഥര്‍ക്കാണ് ഇതുവരെ കോവിഡ് സ്ഥിരീകരിച്ചത്.

 ജീവനക്കാരന് കോവിഡ് സ്ഥിരീകരിച്ചതോടെ, ഏപ്രില്‍ 26 വരെ പൊലീസ് ആസ്ഥാനം അടച്ചിടാനാണ് തീരുമാനിച്ചത്.അതിനിടെ, അടിയന്തരമായ കാര്യങ്ങള്‍ക്ക് അല്ലാതെ ജീവനക്കാരെ ആരെയും പൊലീസ് ആസ്ഥാനത്തേയ്ക്ക് വിളിച്ചുവരുത്തരുത് എന്ന് കാണിച്ച് ഡിപ്പാര്‍ട്ട്‌മെന്റ് തലവന്മാര്‍ക്ക് എഡിജിപി അജയ് കുമാര്‍ ശര്‍മ്മ നിര്‍ദേശം നല്‍കി. അതുവരെ വീടുകളില്‍ ഇരുന്ന് ജോലി ചെയ്യാനും ഉത്തരവില്‍ പറയുന്നു.

പൊലീസ് ആസ്ഥാനത്ത് ഡയറക്ടര്‍ ജനറലിന്റെ ഡ്രൈവര്‍ക്ക് കോവിഡ് സ്ഥിരികരിച്ചതാണ് ആശങ്കയ്ക്ക് കാരണം. ഇദ്ദേഹവുമായുളള സമ്പര്‍ക്കം വഴി പൊലീസ് ആസ്ഥാനത്ത് ജോലി ചെയ്യുന്ന ക്ലര്‍ക്കിനും രോഗബാധ ഉണ്ടായി. നിലവില്‍ ഡിജിപി ഉള്‍പ്പെടെയുളള ഉദ്യോഗസ്ഥര്‍ വീട്ടില്‍ ക്വാറന്റൈനിലാണ്.ഈ പശ്ചാത്തലത്തിലാണ് പൊലീസ് ആസ്ഥാനം അടയ്ക്കാന്‍ നിര്‍ദേശിച്ചത്.