ഫത്തേപ്പൂര്‍: ഭാര്യയെ വെട്ടിക്കൊന്ന ശേഷം രക്ഷപെടാന്‍ ശ്രമിച്ച ഭര്‍ത്താവിനെ നാട്ടുകാര്‍ തല്ലിക്കൊന്നു. ഉത്തര്‍പ്രദേശിലെ ഫത്തേപൂരിലാണ് സംഭവം. 40 കാരനായ നസീര്‍ ഖുറേഷിയെയാണ് നാട്ടുകാര്‍ തല്ലിക്കൊന്നത്. അഭിപ്രായ വ്യത്യാസത്തെ തുടര്‍ന്നുള്ള വഴക്കാണ് ഭാര്യയുടെ കൊലപാതകത്തില്‍ കലാശിച്ചത്. 

നസീര്‍ ഖുറേഷിയുടെ ഭാര്യ അഫ്‌സാരിയാണ് കൊല്ലപ്പെട്ടത്. കോടാലി ഉപയോഗിച്ചാണ് ഇയാള്‍ ഭാര്യയെ വെട്ടിയത്. സംഭവസ്ഥലത്ത് വച്ചുതന്നെ ഇവര്‍ കൊല്ലപ്പെട്ടു. കൊലപാതകം അറിഞ്ഞ് നാട്ടുകാര്‍ ഓടികൂടിയപ്പോഴേക്കും നസീര്‍ ഓടി രക്ഷപ്പെടാന്‍ ശ്രമിച്ചു.

തുടര്‍ന്ന് അക്രമാസക്തരായ നാട്ടുകാര്‍ ഇയാളെ തല്ലിക്കൊല്ലുകയായിരുന്നു. നസീറിനെ ആള്‍ക്കൂട്ടം മര്‍ദിക്കുന്നതിന്റെ ദൃശ്യങ്ങളും പുറത്തുവന്നിട്ടുണ്ട്. കല്ലെറിഞ്ഞും ഇരുമ്പ് കമ്പികൊണ്ട് മര്‍ദിച്ചുമാണ് നാട്ടുകാര്‍ നസീറിനെ കൊലപ്പെടുത്തിയത്. വിഡിയോ വൈറലായതിന് പിന്നാലെ ആള്‍ക്കൂട്ടത്തിലെ അഞ്ചുപേരെ പൊലീസ് അറസ്റ്റ് ചെയ്തു.