ഭോപ്പാല്‍: മദ്യം വാങ്ങാന്‍ പണം നിഷേധിച്ചതില്‍ കുപിതനായ യുവാവ് അമ്മയുടെ കയ്യിലിരുന്ന കുഞ്ഞിനെ കിണറ്റിലെറിഞ്ഞ് കൊന്നു. മധ്യപ്രദേശിലെ  പത്രോളിയ്‌ലാണ് ദാരുണ സംഭവം ഉണ്ടായത്. ആശിഷ് എന്ന രണ്ട് വയസുകാരനെയാണ് ബന്ധുവായ കനയ്യ കൊലപ്പെടുത്തിയത്.

 ആശിഷിന്റെ അമ്മയില്‍ നിന്ന് മദ്യം വാങ്ങുന്നതിനായി 50 രൂപ കനയ്യ ആവശ്യപ്പെട്ടു. പണമില്ലെന്ന് പറഞ്ഞപ്പോള്‍ കുട്ടിയെ തട്ടിപ്പറിച്ച് പുറത്തേക്ക് ഓടി. പരിസരം മുഴുവന്‍ അന്വേഷിച്ചുവെങ്കിലും കുഞ്ഞിനെ കണ്ടെത്താനായില്ല. പിറ്റേന്ന് രാവിലെ ഫാമിനുള്ളിലെ കിണറ്റില്‍ നിന്നുമാണ്‌  കുഞ്ഞിന്റെ ജഡം കണ്ടെത്തിയത്. പ്രതിയെ അറസ്റ്റ് ചെയ്തുവെന്നും റിമാന്‍ഡിലുണ്ടെന്നും പൊലീസ് വെളിപ്പെടുത്തി.

 ജോലിയാവശ്യത്തിനായാണ് മൊറായ് ഗ്രാമവാസിയായിരുന്ന അനിലും ഭാര്യ സവിതയും രണ്ട് വയസുള്ള മകനുമൊത്ത് പത്രോളിയിലേക്ക് താമസം മാറിയത്.
കനയ്യ വീട്ടില്‍ കയറി കുട്ടിയെ തട്ടിക്കൊണ്ട് പോകുമ്പോള്‍ സവിത മാത്രമാണ് ഉണ്ടായിരുന്നതെന്ന് പൊലീസ് വെളിപ്പെടുത്തി.

തട്ടിക്കൊണ്ട് പോയി അപായപ്പെടുത്തല്‍, കൊലപാതകം എന്നീ കുറ്റങ്ങളാണ് കനയ്യയ്ക്ക് മേല്‍ ചുമത്തിയിരിക്കുന്നതെന്ന് പൊലീസ് അറിയിച്ചു.