ബംഗളൂരു: ബംഗളൂരു നഗരം മറ്റൊരു ബ്രസീല്‍ ആയി മാറുമെന്ന താക്കീതുമായി കര്‍ണാടക മുന്‍ മുഖ്യമന്ത്രി എച്ച് ഡി കുമാരസ്വാമി. അതിനാല്‍ ഉടന്‍ തന്നെ കര്‍ണാടകയില്‍ അടച്ചിടല്‍ പ്രഖ്യാപിക്കാന്‍ കുമാരസ്വാമി ആവശ്യപ്പെട്ടു. കുറഞ്ഞപക്ഷം ബംഗളൂരു നഗരമെങ്കിലും അടച്ചിടാന്‍ സര്‍ക്കാര്‍ തയ്യാറാവണമെന്നും അദ്ദേഹം നിര്‍ദേശിച്ചു.

20 ദിവസം കൂടി അടച്ചിടല്‍ പ്രഖ്യാപിക്കാന്‍ സര്‍ക്കാര്‍ തയ്യാറാകണം. കോവിഡ് വ്യാപനം ശമനമില്ലാതെ തുടരുന്ന പശ്ചാത്തലത്തിലാണ് കുമാരസ്വാമിയുടെ പ്രതികരണം. ലോക്ക്ഡൗണ്‍ നിയന്ത്രണങ്ങളില്‍ ഇളവുകള്‍ പ്രഖ്യാപിച്ചതാണ് കോവിഡ് കേസുകള്‍ ഉയരാന്‍ കാരണം. അതിനാല്‍ സംസ്ഥാനം അടച്ചിടാന്‍ സര്‍ക്കാര്‍ തയ്യാറാവണം. കുറഞ്ഞപക്ഷം കേസുകള്‍ ഏറ്റവുമധികം റിപ്പോര്‍ട്ട് ചെയ്യുന്ന ബംഗളുരൂ നഗരത്തിലെങ്കിലും സമ്പൂര്‍ണ ലോക്ക്ഡൗണ്‍ പ്രഖ്യാപിക്കണമെന്നും അദ്ദേഹം ആവശ്യപ്പെട്ടു.

തുറന്നിടല്‍ ആരംഭിച്ചതിന് ശേഷം കോവിഡ് കേസുകള്‍ അതിവേഗമാണ് ഉയരുന്നത്. മനുഷ്യന്റെ ജീവന്‍ വച്ചുളള കളി അവസാനിപ്പിക്കണം. കുറച്ച് മേഖല മാത്രം അടച്ചിട്ടത് കൊണ്ട് ഒരു കാര്യവുമില്ല. ജനങ്ങളുടെ സുരക്ഷയ്ക്ക് പ്രാധാന്യം നല്‍കുന്നുണ്ടെങ്കില്‍ 20 ദിവസം കൂടി അടച്ചിടാന്‍ തയ്യാറാവണമെന്നും കുമാരസ്വാമി പറഞ്ഞു.