ന്യൂഡല്‍ഹി: ശ്രീകൃഷ്ണന്‍ ഇതിഹാസ പൂവാലനായിരുന്നുവെന്ന പരാമര്‍ശത്തില്‍ മാപ്പ് പറഞ്ഞ് മുതിര്‍ന്ന അഭിഭാഷകനും മുന്‍ എഎപി നേതാവുമായ പ്രശാന്ത് ഭൂഷണ്‍. പരാമര്‍ശം വലിയ വിവാദമാവുകയും പ്രതിഷേധം ശക്തമാവുകയും ചെയ്തതോടെയാണ് മാപ്പ് പറയുന്നതായും, വിവാദത്തിനിടയാക്കിയ ട്വീറ്റ് ഡിലീറ്റ് ചെയ്യുന്നതായും അദ്ദേഹം ട്വിറ്ററിലൂടെ വ്യക്തമാക്കിയത്. 

യുപി മുഖ്യമന്ത്രി യോഗി ആദിത്യനാഥിന്റെ ആന്റി റോമിയോ സ്‌ക്വാഡിനെ പരിഹസിച്ചായിരുന്നു പ്രശാന്ത് ഭൂഷണിന്റെ പരാമര്‍ശം. ആന്റി റോമിയോ സ്‌ക്വാഡിനെ ആന്റി കൃഷ്ണ സ്‌ക്വാഡ് എന്ന് പേര് മാറ്റാന്‍ ആദിത്യനാഥിന് ധൈര്യമുണ്ടോയെന്നും പ്രശാന്ത് ഭൂഷണ്‍ ട്വിറ്ററിലൂടെ ചോദിച്ചിരുന്നു. 

പ്രശാന്ത് ഭൂഷണിന്റെ വീടിന് നേരെ സുദര്‍ശന്‍ വാഹിനി പ്രവര്‍ത്തകര്‍ ആക്രമണം നടത്തിയിരുന്നു. ഇതുകൂടാതെ മധുരയിലും വൃന്ദാവനിലും പ്രതിഷേധക്കാര്‍ അദ്ദേഹത്തിന്റെ കോലം കത്തിക്കുകയുമുണ്ടായി. ഇതേ തുടര്‍ന്നാണ് തന്റെ പരാമര്‍ശം ഒരു വിഭാഗത്തിന്റെ വികാരങ്ങളെ വ്രണപ്പെടുത്തുന്നതായിരുന്നെന്ന് സമ്മതിച്ച് ഭൂഷണ്‍ തന്റെ ട്വീറ്റ് പിന്‍വലിച്ച് മാപ്പ് പറഞ്ഞിരിക്കുന്നത്.