ബേഡ്: സഹോദരന്റെ പ്രണയത്തെ പിന്തുണച്ചെന്ന് കുറ്റം ചുമത്തി യുവതിയെ നഗ്നയാക്കി റോഡിലൂടെ നടത്തിച്ചു. മഹാരാഷ്ട്രയിലെ ബേഡ് ജില്ലയിലായിരുന്നു സംഭവം. വെള്ളിയാഴ്ചയാണ് സംഭവം നടന്നതെങ്കിലും തിങ്കളാഴ്ചയാണ് ഈ സംഭവം പുറംലോകം അറിയുന്നത്. 

സഹോദരന്‍ പ്രണയിക്കുന്ന പെണ്‍കുട്ടിയുടെ വീട്ടുകാരാണ് യുവതിയെ ക്രൂരമായി ആക്രമിച്ചത്. ആഗസ്റ്റ് 2ന് ഭര്‍ത്താവിന്റെ മുന്നിലിട്ട് ഈ യുവതിയെ ക്രൂരമായി ഇവര്‍ മര്‍ദ്ദിച്ചിരുന്നു. ഭാര്യയും ഭര്‍ത്താവും ക്ഷമ ചോദിച്ചതിന് ശേഷം അക്രമി സംഘം മടങ്ങി. എന്നാല്‍ ആഗസ്റ്റ് നാലിന് ഭര്‍ത്താവ് ഇല്ലാത്ത സമയത്ത് വീട്ടിലെത്തിയ സംഘം യുവതിയെ അതിക്രമത്തിന് ഇരയാക്കുകയായിരുന്നു. 

ഗ്രാമത്തിലൂടെ യുവതിയെ നഗ്നയാക്കി വലിച്ചിഴച്ച് കൊണ്ടുപോയതിന് പുറമെചെരുപ്പു കൊണ്ട്‌ മര്‍ദ്ദിക്കുകയും ചെയ്തിരുന്നു. കേസില്‍ എഫഐആര്‍ രജിസ്റ്റര്‍ ചെയ്ത പൊലീസ് എട്ടു പേരെ അറസ്റ്റ് ചെയ്തിട്ടുണ്ട്. 

പ്രായപൂര്‍ത്തിയാകാത്ത പെണ്‍കുട്ടിയുമായിട്ടായിരുന്നു ഇവരുടെ സഹോദരന് അടിപ്പമുണ്ടായിരുന്നത് എന്നാണ് ആരോപണം. ഈ പെണ്‍കുട്ടിയേയും പൊലീസ് കസ്റ്റഡിയിലെടുത്തിരുന്നു.