ബംഗളൂരു: ചരക്കുതീവണ്ടിക്ക് മുകളിൽക്കയറി ‘ടിക്‌ടോക്’ വീഡിയോ ചിത്രീകരിക്കുന്നതിനിടെ യുവാവിന്  ഷോക്കേറ്റു.  ബംഗളൂരു സ്വദേശിയായ 22-കാരനാണ് വൈദ്യുതാഘാതമേറ്റത്. ബുധനാഴ്ച വൈകീട്ട് ആറുമണിയോടെ സിറ്റി റെയിൽവേ സ്റ്റേഷനിലാണ് അപകടമുണ്ടായത്.

മൈസൂരുവിൽനിന്നെത്തിയ ​ഗുഡ്സ് ട്രെയിനിന്റെ മുകളിൽക്കയറി വീഡിയോ ചിത്രീകരിക്കുന്നതിനിടെ മുകളിലൂടെ പോകുന്ന ഹൈടെൻഷൻ വൈദ്യുതിക്കമ്പിയിൽ തട്ടുകയായിരുന്നു. ഇതോടെ യുവാവ് താഴേക്ക് തെറിച്ചുവീണു. റെയിൽവേ ജീവനക്കാരുടെ ശ്രദ്ധയിൽപെട്ടതാണ് യുവാവിന് രക്ഷയായത്. ഉടൻ തൊട്ടടുത്ത ആശുപത്രിയിലെത്തിച്ചു. ഇയാളുടെ നില ഗുരുതരമല്ലെന്ന് ആശുപത്രി അധികൃതർ അറിയിച്ചു.

മാണ്ഡ്യയിൽ കുളത്തിലിറങ്ങി ‘ടിക്‌ടോക്’ വീഡിയോ ചിത്രീകരിക്കാൻ ശ്രമിക്കുന്നതിനിടെ പതിനേഴുകാരി മുങ്ങിമരിച്ചത് കഴിഞ്ഞ ഒക്ടോബറിലാണ്. തുടർന്ന് ‘ടിക്‌ടോക്’ നിരോധിക്കണമെന്നാവശ്യപ്പെട്ട് സാമൂഹിക മാധ്യമങ്ങളിൽ വലിയതോതിലുള്ള പ്രചാരണങ്ങൾ നടന്നിരുന്നു.