പത്തനംതിട്ട; പത്തുവയസ്സുകാരിയെ ഒരു വർഷത്തോളം ലൈം​ഗിക പീഡനത്തിന് ഇരയാക്കിയ ആൾക്ക് 142 വര്‍ഷത്തെ തടവ് ശിക്ഷ. കവിയൂര്‍ ഇഞ്ചത്തടി പുലിയളയില്‍ ബാബു (41)നെയാണ് പത്തനംതിട്ട പോക്‌സോ കോടതി ശിക്ഷിച്ചത്. പ്രിന്‍സിപ്പല്‍ ജഡ്ജ് ജയകുമാര്‍ ജോൺ ആണ് ശിക്ഷ വിധിച്ചത്. 

വിവിധ വകുപ്പുകളിലായാണ് 142 വര്‍ഷത്തെ ശിക്ഷ. ഇത് ഒരുമിച്ചാകുമ്പോള്‍ 60 വര്‍ഷത്തെ കഠിനതടവ് അനുഭവിച്ചാല്‍ മതി. പ്രതി അഞ്ചുലക്ഷം രൂപ പിഴയും ഒടുക്കണം. ഇല്ലെങ്കില്‍ മൂന്നുവര്‍ഷം അധികതടവും അനുഭവിക്കണം.

2020 മുതലാണ് കുട്ടി പീഡനത്തിന് ഇരയായത്.  കുട്ടിയുടെ പെരുമാറ്റവും രാത്രികാലങ്ങളില്‍ കരയുന്നതും ശ്രദ്ധയില്‍പ്പെട്ട അമ്മ ഭര്‍ത്താവിനെ വിവരം ധരിപ്പിച്ചു. ചോദിച്ചപ്പോഴാണ് കുട്ടി അതിക്രൂരമായ പീഢനവിവരങ്ങള്‍ പറഞ്ഞത്. പ്രോസിക്യൂഷന് വേണ്ടി പ്രിസിപ്പല്‍ പോക്സോ പ്രോസിക്യൂട്ടര്‍ അഡ്വ.ജയ്‌സണ്‍ മാത്യൂസ് ഹാജരായി.

സാക്ഷിമൊഴികളും മെഡിക്കല്‍ രേഖകള്‍ ഉള്‍പ്പെടെയുള്ള മറ്റു തെളിവുകളുടേയും അടിസ്ഥാനത്തിലായിരുന്നു വിധി. തിരുവല്ല പോലീസ് രജിസ്റ്റർ ചെയ്ത കേസ് അന്വേഷിച്ചത് സിഐ പി. ഹരിലാലാണ്.

ഈ വാര്‍ത്ത കൂടി വായിക്കൂ 

മുന്നിൽ കാട്ടാന, പേടിച്ച് ബൈക്കിൽ നിന്ന് വീണ് അധ്യാപകർക്ക് പരിക്ക്​

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ