തൊടുപുഴ: ഇടുക്കി കമ്പംമെട്ട് നിരപ്പേക്കടയില്‍ സഹോദര പുത്രനെ ആസിഡ് ഒഴിച്ചു കൊലപെടുത്തിയ വയോധികയും മരിച്ചു. ഏറ്റുമാനൂര്‍ കാട്ടാചിറ സ്വദേശിനി കുറ്റിയാനിയില്‍ തങ്കമ്മയാണ് മരിച്ചത്. 84 വയസ്സായിരുന്നു. ആസിഡ് ആക്രമണത്തില്‍ തങ്കമ്മയ്ക്കും പരിക്ക് ഏറ്റിരുന്നു.

ഒക്ടോബര്‍ 24 നായിരുന്നു തങ്കമ്മ സഹോദരന്റെ മകനായ വയോധികനായ സുകുമാരനെ കൊലപെടുത്തിയത്. ഇരുവരും തമ്മില്‍ സമ്പത്തിക തര്‍ക്കം നിലനിന്നിരുന്നു. ദിവസങ്ങള്‍ക്ക് മുന്‍പ് കുഴിതൊളുവിലെ സുകുമാരന്റെ വീട്ടില്‍ എത്തിയ തങ്കമ്മ ഇതേ ചൊല്ലി തര്‍ക്കിക്കുകയും തുടര്‍ന്ന് സുകുമാരന്റെ മുഖത്ത് ആസിഡ് ഒഴിക്കുകയുമായിരുന്നു. സംഭവദിവസം തന്നെ സുകുമാരന്‍ മരിച്ചു.

ആസിഡ് ഒഴിയ്ക്കുന്നതിനിടെ തങ്കമ്മ പൊള്ളല്‍ ഏറ്റിരുന്നു. തുടര്‍ന്ന് ഇടുക്കി മെഡിക്കല്‍ കോളജില്‍ ചികിത്സയില്‍ ആയിരുന്ന ഇവരെ വിദഗ്ദ്ധ ചികിത്സയ്ക്കായി, കഴിഞ്ഞ ദിവസം കോട്ടയം മെഡിക്കല്‍ കോളജിലേയ്ക് മാറ്റിയെങ്കിലും ചികിത്സയ്ക്കിടെ ഇന്ന് മരണത്തിന് കീഴടങ്ങി.