കോട്ടയം: കാഞ്ഞിരപ്പള്ളി അമല്ജ്യോതി എഞ്ചിനിയറിങ് കോളജില് വിദ്യാര്ഥിനി ആത്മഹത്യ ചെയ്തതിന് പിന്നാലെ ഉയര്ന്ന പ്രതിഷേധത്തില് പ്രതികരണവുമായി സിറോ മലബാര് സഭ കാഞ്ഞിപ്പള്ളി രൂപത. സമരം ചില തത്പര കക്ഷികള് ആസൂത്രണം ചെയ്തതാണെന്ന് വികാരി ജനറല് ബോബി അലക്സ് മണ്ണംപ്ലാക്കല് പറഞ്ഞു. ക്രിസ്ത്യന് സ്ഥാപനങ്ങള് തെരഞ്ഞുപിടിച്ച് ആക്രമിക്കാന് ശ്രമം നടക്കുന്നു. ശ്രദ്ധ സതീഷിന് ചികിത്സ ലഭിച്ചില്ല എന്ന ആരോപണം അടിസ്ഥാന രഹിതമാണെന്നും അദ്ദേഹം പറഞ്ഞു.
ശ്രദ്ധ വീട്ടില് നിന്ന് വന്നതിന് തൊട്ടടുത്ത ദിവസമാണ് സംഭവം ഉണ്ടായത്. ഒന്നാം തീയതി റിസള്ട്ട് വന്നപ്പോള് ശ്രദ്ധ 16 പേപ്പറുകളില് 12ലും പരാജയപ്പെട്ടിരുന്നെന്നും വികാരി ജനറല് പറഞ്ഞു.
അതേസമയം, ശ്രദ്ധയുടെ ആത്മഹത്യ അന്വേഷിക്കാന് സാങ്കേതിക സര്വകലാശാല രണ്ടംഗ അന്വേഷണ കമ്മീഷനെ നിയോഗിച്ചു. സംഘം നാളെ കോളജില് എത്തി തെളിവെടുപ്പ് നടത്തും. ഉന്നത വിദ്യാഭ്യാസ മന്ത്രി ആര് ബിന്ദുവും സഹകരണ വകുപ്പ് മന്ത്രി വി എന് വാസവനും നാളെ കോളജിലെത്തി മാനേജ്മെന്റുമായും വിദ്യാര്ഥികളുമായും ചര്ച്ച നടത്തും.
രണ്ടാം വര്ഷ വിദ്യാര്ഥിനി ശ്രദ്ധ ജീവനൊടുക്കാന് കാരണം അധ്യാപകരുടെയും മാനേജ്മെന്റിന്റെയും മാനസ്സിക പീഡനമാണെന്ന് ആരോപിച്ച് വിദ്യാര്ഥികളും ബന്ധുക്കളും രംഗത്തുവന്നിരുന്നു. ഹോസ്റ്റല് മുറിയില് തൂങ്ങിനിന്ന നിലയില് കണ്ടെത്തിയ ശ്രദ്ധയെ ആശുപത്രിയില് എത്തിക്കാന് വൈകി എന്നു കുടുംബം ആരോപിച്ചിരുന്നു. കോളജ് എച്ച്ഒഡിയും അധ്യാപകരും ഹോസ്റ്റല് വാര്ഡനും ശ്രദ്ധയെ മാനസ്സികമായി തകര്ക്കുന്ന തരത്തിലാണ് പെരുമാറിയതെന്ന് വിദ്യാര്ഥികള് ആരോപിച്ചു.
പ്രതിഷേധം കനത്ത സാഹചര്യത്തില് ക്യാമ്പസ് അടയ്ക്കാനുള്ള മാനേജ്മെന്റ് തീരുമാനത്തിന് എതിരെ വിദ്യാര്ഥികള് രംഗത്തെത്തി. കോളജില് വിദ്യാര്ഥികളും പൊലീസും തമ്മില് സംഘര്ഷമുണ്ടായി. പൊലീസ് ലാത്തിചാര്ജ് നടത്തിയെന്ന് വിദ്യാര്ഥികള് ആരോപിച്ചു. വിദ്യാര്ഥികളെ കോളജില് പൂട്ടിയിട്ടുവെന്നും ഇന്റേര്ണല് മാര്ക്ക് കുറയ്ക്കുമെന്ന് അധ്യാപകര് ഭീഷണിപ്പെടുത്തിയെന്നും വിദ്യാര്ഥികള് ആരോപിച്ചു. യാതൊരു പ്രകോപനവുമില്ലാതെയാണ് പൊലീസ് തങ്ങള്ക്കു നേരെ കൈയേറ്റം നടത്തിയതെന്നും വിദ്യാര്ഥികള് പറഞ്ഞു.
ഈ വാര്ത്ത കൂടി വായിക്കൂ വിദ്യാര്ഥിനിയുടെ ആത്മഹത്യ; സര്ക്കാര് ഇടപെടുന്നു, മന്ത്രിമാര് അമല്ജ്യോതി കോളജിലേക്ക്
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates