കൊച്ചി; സംസ്ഥാനത്ത് വെളിച്ചെണ്ണ വില സർവകാല റെക്കോഡിലേക്ക്. കൊച്ചിയിൽ വെളിച്ചെണ്ണയ്ക്ക് കിന്റലിന് 350 രൂപയാണ് വർധിച്ചത്. മൊത്തവില ഒരു കിലോയ്ക്ക് 205 രൂപ 50 പൈസയാണ് വില. കഴിഞ്ഞ വർഷത്തെ ഏറ്റവും ഉയർന്ന മൊത്തവില 155.50 രൂപയായിരുന്നു. പത്ത് വർഷത്തെ ഏറ്റവും ഉയർന്ന വിലയാണിത്. 

ഫെബ്രുവരി ആദ്യ ആഴ്ച തന്നെ കിലോ​ഗ്രാമിന് 200 പൂപ കടന്നിരുന്നു. തുടർന്നുള്ള ദിവസങ്ങളിൽ ചെറിയ വർധനവുണ്ടായി. ബ്രാൻഡഡ് പായ്ക്കറ്റ് വെളിച്ചെണ്ണയുടെ വിലയും കുതിച്ചുയരുകയാണ്. മറ്റ് എണ്ണകളുമായി ചേർത്ത് വെളിച്ചെണ്ണ വിൽക്കുന്നതിൽ ഇപ്പോൾ അനുമതി നൽകുന്നുണ്ട്. ഇത്തരം എണ്ണയ്ക്കും വില കൂടുകയാണ്. തമിഴ്നാട്ടിൽ നിന്നാണ് കുറേയധികം ബ്രാൻഡഡ് വെളിച്ചെണ്ണകൾ എത്തുന്നത്. തമിഴ് നാട്ടിലും വിലകൂടുന്നുണ്ടെന്നും കച്ചവടക്കാർ പറയുന്നു. 

2017 ലാണ് ഇതുവരെ ഏറ്റവും കൂടുതൽ വില വർധിച്ചത്. 2017 ഡിസംബറിൽ 165.50 രൂപയായിരുന്നു കൊച്ചിയിലെ മൊത്തവില. കൊപ്ര വലിയ രീതിയിൽ സംഭരിക്കുന്നതാണ് വിലക്കയറ്റത്തിന് കാരണമായി പറയുന്നത്. ഇതോടൊപ്പം പാംഓയിൽ സൺഫ്ലവർ ഓയിൽ എന്നിവയ്ക്കും വില വർധിക്കുന്നുണ്ട്.