തിരുവനന്തപുരം: സര്‍ക്കാരിന്റെ സരള്‍ ബില്ലിനെതിരെ ജി സുധാകരന്‍. സരള്‍ ബില്‍ ഈ രൂപത്തില്‍ നടപ്പിലാക്കരുതെന്നും നമ്മുടെ കൃഷി ഭൂമി നഷ്ടപ്പെടുമെന്നും ജി സുധാകരന്‍ പറഞ്ഞു. ഈ ബില്ലിലെ നിര്‍ദേശങ്ങള്‍ കുട്ടിക്കളിയല്ല. ഇത് സരളമെന്ന് തോന്നാമെങ്കിലും കരാള ബില്ലാണ്. മുഖ്യമന്ത്രി ഈ ബില്ലിനെ കുറിച്ച് വേണ്ടത്ര പഠിച്ചിട്ടില്ലെന്നും ഇതിന്റെ ആപത്ത് ഈ സര്‍ക്കാരിന്റെ കാലത്തുതന്നെ മനസിലാകുമെന്നും ജി സുധാകരന്‍ പറഞ്ഞു.

നെല്‍വയലുകള്‍ക്കും തണ്ണീര്‍ത്തടങ്ങള്‍ക്കും ഭീഷണിയാകുന്നതാണ് സരള്‍ ബില്‍ എന്ന് ജി സുധാകരന്‍ പറഞ്ഞു. വനമേഖല, തണ്ണീര്‍ത്തടം, ഗ്രൗണ്ട് വാട്ടര്‍ എന്നിവ നശിക്കാതിരിക്കാനുള്ള കരുതല്‍ വേണം. പ്രശ്‌നം ഇല്ല എന്ന് പറഞ്ഞാല്‍ മാത്രം പോരാ.സംരക്ഷണം ബില്ലില്‍ എഴുതി വയ്ക്കണം. ഇല്ലെങ്കില്‍ ഈ ബില്ല് യുഡിഎഫ് ഗവണ്‍മെന്റിന് ബാധ്യതയാകും.

'ബില്‍ പാസായാല്‍ വനപ്രദേശങ്ങളുടെയും തണ്ണീര്‍ത്തടങ്ങളുടെയും എണ്ണം കുറയും. സരള്‍ കുട്ടിക്കളി അല്ല. ഇത് സാധാരണ ബില്ല് അല്ല. കുട്ടനാട്ടില്‍ നെല്‍വയല്‍ സംരക്ഷണത്തിനുവേണ്ടി സമരം ചെയ്ത ആളാണ് ഞാന്‍. ഇത് കേള്‍ക്കുന്ന പോലെ സരളമില്ല, കരാള ബില്‍ ആണ്. മന്ത്രി വാക്കാല്‍ പറയുന്നതൊന്നും വിശ്വസിക്കാന്‍ പറ്റില്ല. മുഖ്യമന്ത്രി നന്നായി പഠിക്കുന്ന ആളാണ്. പക്ഷേ മുഖ്യമന്ത്രി ബില്ല് ശരിക്ക് പഠിച്ചിട്ടില്ല. ഈ സര്‍ക്കാരിന്റെ കാലത്ത് തന്നെ ഇതിന്റെ അപകടം ഉണ്ടാകും.നാടിന് ആത്യന്തികമായി ഇത് ദോഷം ചെയ്യും. നിലവിലുള്ള സംരക്ഷണം തുടരുമെന്ന് ഉറപ്പുണ്ടോ എന്നും സുധാകരന്‍ ചോദിച്ചു.

ജി.സുധാകരന് വേണ്ടി കൈ ഉയര്‍ത്തി പ്രതിപക്ഷം രംഗത്തെത്തി. സുധാകരന്റെ ഭേദഗതി നിര്‍ദ്ദേശത്തെ പിന്തുണച്ച് കെ രാജന്‍ എംഎല്‍എ രംഗത്തെത്തി. സുധാകരന്‍ പറഞ്ഞത് ഗൗരവമുള്ള കാര്യമാണ് വോട്ടെടുപ്പില്‍ പ്രതിപക്ഷ അംഗങ്ങളും സുധാകരന്റെ ഭേദഗതിയെ അനുകൂലിച്ചു.

ബില്ല് പാസായാല്‍ തണ്ണീര്‍ തടങ്ങള്‍ക്ക് ഒരു കുഴപ്പവും ഉണ്ടാകില്ലെന്ന് മന്ത്രി പി കെ കുഞ്ഞാലിക്കുട്ടി മറുപടി നല്‍കി. കരുതല്‍ ഉണ്ടാകും. ഭൂമി വിട്ടുകൊടുക്കണമെന്ന് നിര്‍ബന്ധമില്ല. ആര്‍ക്കും ഒരു സെന്റ് സ്ഥലം പോലും നഷ്ടമാകില്ല നെല്‍വയില്‍ ആണെങ്കില്‍ നികത്തുന്നത് തടയാന്‍ ജില്ലാ കളക്ടര്‍ക്ക് അധികാരം ഉണ്ടാകും. അവ നോക്കാതെ എവിടെയും അനുമതി നല്‍കില്ലെന്നും കുഞ്ഞാലിക്കുട്ടി മറുപടി നല്‍കി.

കേരളത്തിലേക്ക് പുതിയ നിക്ഷേപങ്ങളും ബിസിനസ്സുകളും കൂടുതല്‍ എളുപ്പത്തില്‍ ആകര്‍ഷിക്കുന്നതിനായി സംസ്ഥാന സര്‍ക്കാര്‍ കൊണ്ടുവരുന്ന പദ്ധതിയാണ് 'സരള്‍ കേരളം'. വ്യവസായ സംരംഭങ്ങള്‍ക്ക് ആവശ്യമായ ലൈസന്‍സുകളും അനുമതികളും വൈകാതെ ലഭ്യമാക്കുക എന്നതാണ് ഈ പദ്ധതിയുടെ പ്രധാന ലക്ഷ്യം. കേരള വ്യാവസായിക വികസന കോര്‍പ്പറേഷനാണ് ഇതിന്റെ ഏകോപന ചുമതല.