കണ്ണൂര്‍: ഹരിത കര്‍മ്മ സേനാംഗങ്ങളുടെ സത്യസന്ധത കാരണം വീട്ടുടമയ്ക്ക് സ്വര്‍ണ കമ്മലുകള്‍ തിരിച്ചു കിട്ടി. വസന്ത,അനിത എന്നിവരാണ് ലോകത്തിന് മുന്‍പില്‍ മാതൃകയായത്. എ.കെ.ജിയുടെ നാട്ടില്‍ ഹരിതകര്‍മസേനക്ക് അഭിമാനമായിരിക്കുകയാണ് വസന്തയും അനിതയും.

പെരളശ്ശേരി ഗ്രാമ പഞ്ചായത്തിലെ 11 -ാം വാര്‍ഡില്‍ പള്ളിയത്തുള്ള വീട്ടില്‍ നിന്നും പാഴ് വസ്തുക്കളോടൊപ്പം അശ്രദ്ധമായി നല്‍കിപ്പോയ സ്വര്‍ണാഭരണങ്ങള്‍ ഹരിത കര്‍മ സേനാംഗങ്ങളായ വസന്ത, അനിത എന്നിവര്‍ കണ്ടെടുത്ത് വീട്ടുടമക്ക് തിരിച്ചു നല്‍കുകയായിരുന്നു. വിലയേറിയ രണ്ട് കമ്മലുകളാണ് ഇരുവരും വീണ്ടെടുത്ത് നല്‍കിയത്. ചൊവ്വാഴ്ചയാണ് സംഭവം.

ഈയടുത്ത് വിദേശത്തു നിന്നും നാട്ടില്‍ എത്തിയതായിരുന്നു വീട്ടുകാര്‍. സ്വര്‍ണാഭരണങ്ങള്‍ അബദ്ധത്തില്‍ പാഴ് വസ്തുക്കളില്‍ നിക്ഷേപിക്കപ്പെടുകയായിരുന്നു. പാഴ് വസ്തുക്കള്‍ ശേഖരിക്കാനെത്തിയ ഹരിത സേനാംഗങ്ങള്‍ ആദ്യം ഒരു കമ്മലാണ് കണ്ടെത്തിയത്. തുടര്‍ന്ന് രണ്ടാമത്തെതും കണ്ടെടുക്കുകയായിരുന്നു. ഇരുവരും നാടിനും ഹരിത കര്‍മസേനയ്ക്കും അഭിമാനമായതോടെ പഞ്ചായത്ത് അധികൃതരും നാട്ടുകാരും അഭിനന്ദനവുമായി രംഗത്ത് വന്നു.