മുഖ്യമന്ത്രി വിഡി സതീശനെതിരെ വിമര്‍ശനവുമായി കെപിസിസി ജനറല്‍ സെക്രട്ടറി ദീപ്തിമേരി വര്‍ഗീസ്. ബാര്‍ ലൈസന്‍സ് വിഷയത്തില്‍ എക്‌സൈസ് കമ്മീഷണറെ മാറ്റി. നെടുമ്പാശേരി മിനി കൂപ്പര്‍ അപകടത്തില്‍ സുഹൈല്‍ സജീവിന് ജാമ്യമില്ല. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം

തനിക്ക് മേയര്‍ സ്ഥാനം ലഭിക്കാത്തതിനു പിന്നില്‍ കളിച്ചത് എറണാകുളത്തുള്ള രണ്ട് യുവനേതാക്കളാണെന്ന് കെപിസിസി ജനറല്‍ സെക്രട്ടറി അഡ്വ. ദീപ്തി മേരി വര്‍ഗ്ഗീസ്. വി ഡി സതീശനില്‍ സമ്മര്‍ദ്ദം ചെലുത്തിയാണ് ഈ നേതാക്കള്‍ അര്‍ഹതപ്പെട്ട തന്റെ സ്ഥാനം മറ്റൊരാള്‍ക്ക് തട്ടിപ്പറിച്ചു നല്‍കിയത്. നിയമസഭ തെരഞ്ഞെടുപ്പില്‍ തനിക്ക് സീറ്റ് നിഷേധിച്ചതിന് പിന്നിലും ഈ നേതാക്കള്‍ തന്നെയാണെന്ന് ദീപ്തി സമകാലിക മലയാളത്തോട് പറഞ്ഞു

ബാര്‍ ലൈസന്‍സ് അനുവദിച്ചതുമായി ബന്ധപ്പെട്ട വിവാദത്തിന് പിന്നാലെ എക്‌സൈസ് കമ്മീഷണര്‍ സീറാം സാംബശിവ റാവുവിനെ മാറ്റി. അഡീഷണല്‍ കമ്മീഷണര്‍ക്കാണ് താല്‍ക്കാലിക ചുമതല. എക്‌സൈസ് മന്ത്രിയുടെ കടുത്ത അതൃപ്തിക്ക് പിന്നാലെയാണ് മാറ്റം. മന്ത്രി അറിയാതെ ബാറുകള്‍ക്ക് ലൈസന്‍സ് നല്‍കിയത് വിവാദമായിരുന്നു.

ചീഫ് ജസ്റ്റിസ് സൂര്യകാന്തിനെതിരെ കെപിസിസിയുടെ ഔദ്യോഗിക സമൂഹമാധ്യമ അക്കൗണ്ടിൽ വന്ന വിവാദ പോസ്റ്റിൽ ഭാരവാഹികൾക്ക് കോടതിയലക്ഷ്യ നോട്ടീസ് അയച്ച് സുപ്രീം കോടതി. കെപിസിസി പ്രസിഡന്റ് ഉൾപ്പെടെയുള്ള ഭാരവാഹികൾക്കാണ് കോടതി നോട്ടീസ് അയച്ചിരിക്കുന്നത്. അഡ്വ. വിനീത് ജിൻഡാൽ നൽകിയ പൊതുതാൽപ്പര്യ ഹർജിയിലാണ് നടപടി.

നെടുമ്പാശ്ശേരിയിൽ മൂന്ന് യുവതീയുവാക്കളുടെ മരണത്തിനിടയാക്കിയ മിനി കൂപ്പർ വാഹനാപകടക്കേസിൽ ഒന്നാം പ്രതി സുഹൈൽ സജീവിന് ജാമ്യമില്ല. സുഹൈൽ സജീവ് ഒഴികെയുള്ള മൂന്ന് പ്രതികൾക്ക് ജാമ്യം അനുവദിച്ചു. സുഹൈലിന് പത്ത് ദിവസത്തിന് ശേഷം ജാമ്യം നൽകുമെന്നും ഹൈക്കോടതി . നാല് പ്രതികളുടെ ജാമ്യാപേക്ഷ പരിഗണിച്ചുകൊണ്ടാണ് കോടതിയുടെ ഉത്തരവ്.

നിയമപഠനം നടത്താന്‍ ആഗ്രഹിക്കുന്നവര്‍ക്ക് പ്രായം ഇനി തടസമാകില്ല. മൂന്ന് വര്‍ഷ, അഞ്ച് വര്‍ഷ എല്‍എല്‍ബി കോഴ്സുകളിലേക്കുള്ള പ്രവേശനത്തിന് ഏര്‍പ്പെടുത്തിയിരുന്ന ഉയര്‍ന്ന പ്രായപരിധി ബാര്‍ കൗണ്‍സില്‍ ഓഫ് ഇന്ത്യ (ബിസിഐ) പിന്‍വലിച്ചു. ഇതോടെ ഏത് പ്രായത്തിലുള്ളവര്‍ക്കും നിയമപഠനത്തിന് പ്രവേശനം നേടാനുള്ള അവസരമാണ് ഒരുങ്ങുന്നത്. വെള്ളിയാഴ്ച ചേര്‍ന്ന ബാര്‍ കൗണ്‍സില്‍ ജനറല്‍ കൗണ്‍സില്‍ യോഗത്തിലാണ് പ്രായപരിധി പിന്‍വലിക്കാന്‍ തീരുമാനമായത്.