കൊല്ലം: ഐക്യരാഷ്ട്രസഭയുടെ ജനറല് അസംബ്ലിയില് മാതാ അമൃതാനന്ദമയി ലോകത്തെ മലയാളത്തില് അഭിസംബോധന ചെയ്തതിന്റെ രജത ജൂബിലി ആഘോഷവേളയില് ആദരവുമായി സംസ്ഥാന സര്ക്കാര്. അമൃത വിശ്വവിദ്യാപീഠം അമൃതപുരി ക്യാംപസില് നടന്ന ചടങ്ങില് സാംസ്കാരികവകുപ്പ് മന്ത്രി സജി ചെറിയാനാണ് മാതാ അമൃതാനന്ദമയിയെ ആദരിച്ചത്. ഐക്യരാഷ്ട്രസഭയിലെ പ്രസംഗം 'അമൃതവര്ഷം 72' വേദിയില് പുനരവതരിപ്പിച്ചപ്പോള് ജന്മദിനാഘോഷത്തില് പങ്കെടുക്കാന് എത്തിയ ആയിരങ്ങള് ഹര്ഷാരവം മുഴക്കി.
ലോകമാകെ സേവനത്തിന്റെയും സ്നേഹത്തിന്റെയും പ്രകാശം പരത്തുന്ന മാതാ അമൃതാനന്ദമയി കേരളത്തിലെ സംസ്കാരിക മൂല്യങ്ങളാണ് മാതൃഭാഷയിലൂടെ ലോകത്തിനുമുന്നില് പരിചയപ്പെടുത്തിയതെന്ന് മന്ത്രി പറഞ്ഞു. മലയാള ഭാഷയുടെയും സംസ്കാരത്തിന്റെയും ശക്തി ലോകത്തിനുമുന്നില് തെളിയിക്കാന് മാതാ അമൃതാനന്ദമയിക്ക് കഴിഞ്ഞു. നമ്മുടെ ഭാഷയെ വിസ്മരിക്കുന്നവര്ക്കുള്ള സന്ദേശമാണ് ഇതെന്നും മന്ത്രി പറഞ്ഞു.
ഈ പുരസ്കാരം മലയാളഭാഷയ്ക്കുതന്നെ സമര്പ്പിക്കുന്നെന്നും മലയാളഭാഷയുടെ പ്രോത്സാഹനത്തിന് എല്ലാ മാതാപിതാക്കളും മക്കളെ പ്രചോദിപ്പിക്കണമെന്നും അമൃതാനന്ദമയി മറുപടി പ്രസംഗത്തില് പറഞ്ഞു.എംഎല്എമാരായ സിആര് മഹേഷ്, ഉമാ തോമസ്, ബിജെപി സംസ്ഥാന വൈസ് പ്രസിഡന്റ് ഡോ. കെഎസ് രാധാകൃഷ്ണന്, ഐജി ലക്ഷ്മണ് ഗുഗുലോത്ത്, കേരള ലോ അക്കാദമി ഡയറക്ടര് നാഗരാജ നാരായണന്, നടന് ദേവന് എന്നിവര് മാതാ അമൃതാനന്ദമയിയെ ആദരിച്ചു. അമൃതാനന്ദമയി മഠം വൈസ് ചെയര്മാന് സ്വാമി അമൃതസ്വരൂപാനന്ദപുരി, സ്വാമിനി സുവിദ്യാമൃതപ്രാണ എന്നിവര് സംസാരിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates