തൃശൂര്‍: ദേശീയപാതയില്‍ തൃശൂര്‍ കുതിരാനിലെ ഗതാഗത കുരുക്കിന് പരിഹാരമായി ഒരു തുരങ്കം ജനുവരിയില്‍ ഗതാഗതത്തിന് തുറന്നുകൊടുക്കും. ഒരു തുരങ്കം ജനുവരിയില്‍ ഗതാഗതത്തിനു തുറന്നു കൊടുക്കാന്‍  കേന്ദ്ര മന്ത്രി നിതിന്‍ ഗഡ്കരി നിര്‍ദേശിച്ചതായി കോണ്‍ഗ്രസ് നേതാവ് ടി എന്‍ പ്രതാപന്‍ എംപി പറയുന്നു. ടി എന്‍ പ്രതാപിന് കേന്ദ്രമന്ത്രി നല്‍കിയ കത്തിലാണ് ഇക്കാര്യം പറയുന്നത്.

രണ്ടാം തുരങ്കത്തിന്റെ നിര്‍മാണവും ഇതോടൊപ്പം മുന്നോട്ടു പോകുമെന്നും കത്തില്‍ കേന്ദ്രമന്ത്രി വ്യക്തമാക്കുന്നു. തുരങ്കത്തിന്റെ ഇരു കവാടങ്ങളിലെയും വന ഭൂമി വിട്ടു കിട്ടാത്തതിനാല്‍ അവിടെ സുരക്ഷാ സംവിധാനം ഏര്‍പ്പെടുത്താനായിട്ടില്ല. ദേശീയ പാതയും തുരങ്കവും നിര്‍മിക്കുന്ന കമ്പനിയുടെ സാമ്പത്തിക പ്രതിസന്ധിയും മറ്റൊരു കാരണമാണ്. പദ്ധതിക്കു കടം നല്‍കിയിരുന്ന ബാങ്കുകളുടെ കൂട്ടായ്മ ഇപ്പോള്‍ പണം നല്‍കുന്നില്ല. കടം തിരിച്ചടയ്ക്കാതെ അക്കൗണ്ട് എന്‍പിഎ ആയി പ്രഖ്യാപിച്ചതാണ് കാരണം.  മറ്റിടങ്ങളില്‍ നിന്നു ഫണ്ട് ശേഖരിച്ചു തുരങ്കം പൂര്‍ത്തിയാക്കാന്‍ കരാറുകാര്‍ക്കു ദേശീയ പാത അതോറിറ്റിയുടെ പ്രത്യേക യോഗം നിര്‍ദേശം നല്‍കിയതായി ഗഡ്കരി പറഞ്ഞു.