കൽപ്പറ്റ: മൂപ്പൈനാട് പഞ്ചായത്ത് പ്രസിഡന്റിനെതിരെ എൽഡിഎഫ് കൊണ്ടുവന്ന അവിശ്വാസ പ്രമേയം പാസായി. പഞ്ചായത്ത് പ്രസിഡന്റായിരുന്ന യുഡിഎഫിലെ സിവി സുധയാണ്‌ പുറത്തായത്‌. എൽഡിഎഫിന്റെ അവിശ്വാസ പ്രമേയം എട്ടിനെതിരെ 9 വോട്ടുകൾക്കാണ് പാസായത്.

പുതിയ പ്രസിഡന്റിനെ തെരഞ്ഞെടുക്കുന്നതുവരെ വൈസ് പ്രസിഡന്റ്‌ സിഎച്ച് റഹിയാനത്തിന്‌ വരണാധികാരി താത്കാലിക ചുമതല നൽകി. ഏഴ് പ്രവർത്തി ദിവസങ്ങൾക്ക് ശേഷമാകും തെരഞ്ഞെടുപ്പ്‌. കഴിഞ്ഞ തദ്ദേശ തെരഞ്ഞെടുപ്പിൽ പഞ്ചായത്തിൽ യുഡിഎഫിന്റെ 25 വർഷത്തെ കുത്തക അവസാനിപ്പിച്ച് എൽഡിഎഫ് വിജയിച്ചിരുന്നു.

ആകെയുള്ള 17 വാർഡുകളിൽ 9 എണ്ണം നേടിയാണ് എൽഡിഎഫ് ഭരണം പിടിച്ചത്. പ്രസിഡന്റ് തെരഞ്ഞെടുപ്പിൽ എൽഡിഎഫ് അംഗത്തിന്റെ ഒരു വോട്ട് അസാധുവായതിനെ തുടർന്ന് നറുക്കെടുപ്പിലൂടെ യുഡിഎഫിന് പ്രസിഡന്റ് സ്ഥാനം ലഭിച്ചു. 6 മാസത്തിനു ശേഷം അവിശ്വാസത്തിലൂടെ സ്ഥാനം നഷ്ടമായി. വൈസ്‌ പ്രസിഡന്റും മുഴുവൻ സ്ഥിരം സമിതി അധ്യക്ഷ സ്ഥാനവും എൽഡിഎഫിനാണ്‌.