തിരുവനന്തപുരം: കേരളത്തില്‍ പൊതുമരാമത്ത് വകുപ്പ് സെക്രട്ടറിയായിരുന്ന കാലത്ത് ഗ്യാനേഷ് കുമാര്‍ നടത്തിയ അഴിമതി, ചട്ടവിരുദ്ധ പ്രവര്‍ത്തനങ്ങള്‍ തുടങ്ങിയവയെക്കുറിച്ച് വിജിലന്‍സ് അന്വേഷണം നടക്കുന്നതായി ആഭ്യന്തരമന്ത്രി രമേശ് ചെന്നിത്തല. ഗ്യാനേഷ് കുമാറിനെതിരെ രണ്ടു മൂന്നു പരാതികള്‍ ആഭ്യന്തര വകുപ്പിന് ലഭിച്ചിട്ടുണ്ട്. മലേഷ്യന്‍ കമ്പനിയായ പതിബെല്ലും, കേരള കമ്പനിയും ചേര്‍ന്നുള്ള കണ്‍സോര്‍ഷ്യമാണ് എംസി റോഡ് പണിതത്. ആ കാലഘട്ടത്തില്‍ നടന്നിട്ടുള്ള അഴിമതികളെക്കുറിച്ചാണ് സാജന്‍ എന്ന വ്യക്തി വിശദമായ പരാതി നല്‍കിയതെന്ന് ചെന്നിത്തല പറഞ്ഞു.

മലേഷ്യന്‍ കമ്പനിയുടെ പ്രോജക്ട് എഞ്ചിനീയറായിരുന്ന ലീയുടെ ആത്മഹത്യയ്ക്ക് പിന്നില്‍ ബില്ലുകള്‍ തടഞ്ഞുവെക്കുകയും, ജീവനക്കാര്‍ക്ക് ശമ്പളം കൊടുക്കാന്‍ കഴിയാത്ത സാഹചര്യത്തിലുമാണ് എന്നാണ് സാജന്റെ പരാതിയില്‍ പറയുന്നത്. അതില്‍ പ്രധാന കുറ്റക്കാരനായി ഗ്യാനേഷ് കുമാറിനെയാണ് ചൂണ്ടിക്കാണിച്ചിട്ടുള്ളത്. ആ പരാതി വിജിലന്‍സിന് കൈമാറി. വിജിലന്‍സ് അന്വേഷണത്തിന് അഴിമതി നിരോധന നിയമപ്രകാരം അനുമതി വേണമായിരുന്നു. മുഖ്യമന്ത്രിയുമായി ആലോചിച്ച് അതിന് അനുമതി നല്‍കിയിട്ടുണ്ട്.

വിജിലന്‍സ് ഡയറക്ടര്‍ വിശദമായ അന്വേഷണത്തിനായി SU-1 ന് കൈമാറിയിട്ടുണ്ട്. എസ്പി ഇമ്മാനുവല്‍ പോളിന്റെ നേതൃത്വത്തിലുള്ള പ്രത്യേക സംഘമാണ് അന്വേഷണം നടത്തുക. പരാതിയില്‍ ധാരാളം പേര്‍ മൊഴി നല്‍കാനായി മുന്നോട്ടു വന്നിട്ടുണ്ട്. മലയിന്‍കീഴ് വേണുഗോപാല്‍ എന്നയാളും ഗ്യാനേഷ് കുമാറിനെതിരെ പരാതി നല്‍കിയിട്ടുണ്ട്. ഗ്യാനേഷ് കുമാറിന്റെ ചട്ട വിരുദ്ധ പ്രവര്‍ത്തനങ്ങള്‍ വിശദമായി അന്വേഷിക്കാനാണ് സര്‍ക്കാര്‍ നിര്‍ദേശം നല്‍കിയിട്ടുള്ളത്. വിജിലന്‍സ് അന്വേഷണങ്ങള്‍ക്ക് തുടക്കമായെന്നും ആഭ്യന്തരമന്ത്രി രമേശ് ചെന്നിത്തല കൂട്ടിച്ചേര്‍ത്തു.