കൊച്ചി: 2025ലെ ഓടക്കുഴല്‍ പുരസ്‌കാരം പ്രഖ്യാപിച്ചു. സാഹിത്യ വിമര്‍ശകന്‍ ഇ പി രാജഗോപാലിനാണ് പുരസ്‌കാരം. 2021 ഓഗസ്റ്റില്‍ പ്രസിദ്ധീകരിച്ച 'ഉള്‍ക്കഥ' എന്ന സാഹിത്യ വിമര്‍ശന ഗ്രന്ഥത്തിനാണ് പുരസ്‌കാരം. 30,000 രൂപയും ശില്പവും പ്രശസ്തിപത്രവും അടങ്ങുന്നതാണ് അവാര്‍ഡ്.

സാഹിത്യനിരൂപകനും വിമര്‍ശകനും നാടകകൃത്തുമാണ് ഇപി രാജഗോപാലന്‍. കാസര്‍കോട് പിലിക്കോട് മാണിയാട്ട് സ്വദേശിയാണ്. 2018-ല്‍ കക്കാട്ട് ഗവണ്മെന്റ് ഹയര്‍ സെക്കണ്ടറി സ്‌കൂളില്‍ നിന്നും പ്രധാനാദ്ധ്യാപകനായി വിരമിച്ചു. കേരള സാഹിത്യ അക്കാദമി അംഗമാണ്. പുരോഗമന കലാ-സാഹിത്യസംഘം സംസ്ഥാന വൈസ് പ്രസിഡന്റുമാണ്. 2006-ല്‍ കേരള സാഹിത്യ അക്കാദമി പുരസ്‌കാരം ലഭിച്ചിരുന്നു.

ഇന്ത്യയിലെ ആദ്യ ജ്ഞാനപീഠ ജേതാവായ മഹാകവി ജി ശങ്കരക്കുറുപ്പ് തനിക്ക് ലഭിച്ച സമ്മാനത്തുകയുടെ ഒരംശം നിക്ഷേപിച്ച് രൂപീകരിച്ചതാണ് ഗുരുവായൂരപ്പന്‍ ട്രസ്റ്റ്. 1968 മുതല്‍ മലയാളത്തിലെ മികച്ച സാഹിത്യ കൃതികള്‍ക്ക് ട്രസ്റ്റ് നല്‍കിവരുന്നതാണ് ഈ പുരസ്‌കാരം. മഹാകവിയുടെ ചരമവാര്‍ഷിക ദിനമായ 2026 ഫെബ്രുവരി 2-ന് വൈകുന്നേരം അഞ്ച് മണിക്ക് എറണാകുളം സമസ്ത കേരള സാഹിത്യ പരിഷത്ത് മന്ദിരത്തിലെ മഹാകവി ജി ഓഡിറ്റോറിയത്തില്‍ വെച്ച് പുരസ്‌കാര സമര്‍പ്പണ ചടങ്ങ് നടക്കും. ചടങ്ങില്‍ പ്രശസ്ത സാഹിത്യകാരനും ട്രസ്റ്റ് പ്രസിഡന്റുമായ സി രാധാകൃഷ്ണന്‍ അവാര്‍ഡ് സമ്മാനിക്കും.