കൊച്ചി: താര സംഘടനയായ 'അമ്മ'യില്‍ നിന്നു നടി പാര്‍വതി തിരുവോത്ത് രാജിവച്ചത് അംഗീകരിച്ചു. പ്രസിഡന്റ് മോഹന്‍ലാല്‍ ഉള്‍പ്പെടെയുള്ളവര്‍ പങ്കെടുത്ത എക്‌സിക്യൂട്ടീവ് യോഗത്തിലാണ് തീരുമാനം. ലഹരി ഇടപാടുമായി ബന്ധപ്പെട്ട പണമിടപാട് കേസില്‍ അറസ്റ്റിലായ ബിനീഷ് കോടിയേരിയോട് വിശദീകരണം തേടും. ഇടവേള ബാബുവിനെതിരെ നടപടി വേണ്ടെന്നും യോഗത്തില്‍ തീരുമാനിച്ചിട്ടുണ്ട്. 

നിലവിലുള്ള കേസുകളുടെ സാഹചര്യത്തില്‍ നടന്‍ കൂടിയായ ബിനീഷിനെ അമ്മയില്‍ നിന്നു പുറത്താക്കണമെന്ന് ആവശ്യമുയര്‍ന്നിരുന്നു. ദിലീപിനെതിരെ കേസെടുത്തപ്പോള്‍ സ്വീകരിച്ച അതേ നിലപാട് ബിനീഷിനെ എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി) അറസ്റ്റ് ചെയ്തപ്പോഴും സംഘടന സ്വീകരിക്കണം എന്നായിരുന്നു അംഗങ്ങളുടെ ആവശ്യം. രണ്ടു പേര്‍ക്ക് രണ്ടു നീതി എന്ന നിലപാട് ശരിയാവില്ല എന്നാണ് ഇവര്‍ പറഞ്ഞത്. 

എന്നാല്‍ എംഎല്‍എമാരായ മുകേഷും ഗണേഷ് കുമാറും ഈ ആവശ്യത്തെ എതിര്‍ത്തു. തിടുക്കപ്പെട്ട് ഇക്കാര്യത്തില്‍ നിലപാട് പാടില്ലെന്നാണ് ഇവര്‍ പറഞ്ഞത്. 2009 മുതല്‍ ബിനീഷ് കോടിയേരി അമ്മയുടെ ആജീവനാന്ത അംഗത്വം എടുത്തിട്ടുണ്ട്.