കണ്ണൂര്‍: ഒന്നാം തവണ മുഖ്യമന്ത്രിയായപ്പോള്‍ അവിചാരിതമായി പത്തനാപുരം ഗാന്ധിഭവന്‍ സന്ദര്‍ശിച്ച മുഖ്യമന്ത്രി അശരണരായ വയോധികര്‍ക്ക് തുണയായി മാറിയെന്ന് ഭാരവാഹി ഡോ. പുനലൂര്‍ സോമരാജന്‍. തന്റെ കുടുംബം പോലെയാണ് അദ്ദേഹം ആ മനുഷ്യരെ കരുതിയത്. ആര്‍ദ്രതയും അനുകമ്പയും അന്തേവാസികളോട് കാണിച്ച മനുഷ്യന്റെ പേരാണ് പിണറായി വിജയനെന്നും പുനലൂര്‍ സോമരാജന്‍ പറഞ്ഞു. ബുധനാഴ്ച വൈകീട്ട് മമ്പറത്ത് നടന്ന എല്‍ഡിഎഫ് കണ്‍വെന്‍ഷനില്‍ തെരഞ്ഞെടുപ്പിന് കെട്ടിവയ്ക്കാനുള്ള പണം പത്തനാപുരം ഗാന്ധിഭവന്‍ അന്തേവാസികള്‍ക്ക് വേണ്ടി പുനലൂര്‍ സോമരാജന്‍ മുഖ്യമന്ത്രിക്ക് കൈമാറി.

ഗാന്ധിഭവനില്‍ നടന്ന ഒരു പരിപാടിക്കിടെ മുഖ്യമന്ത്രി തന്റെ പ്രസംഗത്തിലൂടെ ആവശ്യപ്പെട്ടതു പ്രകാരമാണ് ഗള്‍ഫ് വ്യവസായി എം എ യൂസഫലി രണ്ട് കെട്ടിട സമുച്ചയങ്ങള്‍ നിര്‍മ്മിച്ചു നല്‍കിയത്. കൂടാതെ പ്രതിവര്‍ഷം ഒരു കോടി ഗ്രാന്‍ഡായി നല്‍കുന്നതും. ഇപ്പോള്‍ 1500 പേര്‍ ഇവിടെ താമസിക്കുന്നുണ്ട്. അന്തേവാസികളായ അമ്മമാര്‍ അധ്വാനിച്ചുണ്ടാക്കിയ കൂലിയില്‍ നിന്നാണ് അവരുടെ ആഗ്രഹപ്രകാരം മുഖ്യമന്ത്രിക്ക് കെട്ടിവെച്ച തുക നല്‍കിയത്. ഇത്തവണയും അദ്ദേഹം മുഖ്യമന്ത്രിയായതിനു ശേഷം ഗാന്ധിഭവനിലെത്തുമെന്ന് അവിടെയുള്ള അമ്മമാര്‍ പ്രതീക്ഷിക്കുന്നതായും പുനലൂര്‍ സോമരാജന്‍ പറഞ്ഞു.

മൂന്നാം തവണയും ധര്‍മ്മടത്ത് നിന്ന് ജനവിധി തേടുന്ന മുഖ്യമന്ത്രി പിണറായി വിജയന്‍ ഇന്ന് ( വ്യാഴാഴ്ച) നാമനിര്‍ദേശ പത്രിക സമര്‍പ്പിക്കും. രാവിലെ 11 മണിക്ക് തലശ്ശേരി രജിസ്ട്രാര്‍ ഓഫീസിലാണ് നാമനിര്‍ദേശ പത്രിക സമര്‍പ്പിക്കുക. ഇത് ഏഴാം തവണയാണ് മുഖ്യമന്ത്രി ജനവിധി തേടുന്നത്. കഴിഞ്ഞ തവണ ലഭിച്ചതിനേക്കാള്‍ കൂടുതല്‍ ഭൂരിപക്ഷം ഇത്തവണ ധര്‍മ്മടത്ത് നിന്നും ലഭിക്കുമെന്നാണ് എല്‍ഡിഎഫ് ക്യാംപിന്റെ പ്രതീക്ഷ. സിപിഎം സംസ്ഥാന സെക്രട്ടറി എം വി ഗോവിന്ദന്‍ എല്‍ഡിഎഫ് കണ്‍വെന്‍ഷന്‍ ഉദ്ഘാടനം ചെയ്തു. ബിനോയ് വിശ്വം,ശ്രേയാംസ് കുമാര്‍ എന്നിവര്‍ കണ്‍വെന്‍ഷനില്‍ സംസാരിച്ചു.