മലപ്പുറം: പി വി അന്‍വറുമായുള്ള പ്രശ്‌നത്തില്‍ മുസ്ലിം ലീഗ് മധ്യസ്ഥതയ്ക്കില്ലെന്ന് പി കെ കുഞ്ഞാലിക്കുട്ടി ( PK Kunhalikutty ). പി വി അന്‍വര്‍ ഇപ്പോഴുള്ള വിഷയങ്ങള്‍ ഞങ്ങളോട് സംസാരിച്ചിരുന്നു. ഇക്കാര്യങ്ങളെല്ലാം നിലമ്പൂരില്‍ ചെല്ലുമ്പോള്‍ കോണ്‍ഗ്രസ് നേതാക്കളുമായി സംസാരിക്കും. ലീഗ് ഇതില്‍ മീഡിയേഷനില്ല. എല്ലാ ഘടകകക്ഷികളേയും കാണുന്ന കൂട്ടത്തില്‍ അന്‍വര്‍ ലീഗിനേയും കണ്ടു എന്നേയുള്ളൂ എന്നും പി കെ കുഞ്ഞാലിക്കുട്ടി പറഞ്ഞു.
തെരഞ്ഞെടുപ്പിന് മുമ്പായി യുഡിഎഫിന് മുമ്പില്‍ വന്നിട്ടുള്ള പ്രശ്‌നങ്ങളെല്ലാം എല്ലാവരും കൂടി കൈകാര്യം ചെയ്യും. ഘടകകക്ഷികള്‍ എന്ന നിലയില്‍ അങ്ങോട്ടുമിങ്ങോട്ടും ആശയവിനിമയം നടത്തുന്നത് സാധാരണമാണ്. അതല്ലാതെ പ്രത്യേകമായിട്ടുള്ള മീഡിയോഷന്‍ ഒന്നുമില്ല. ഡല്‍ഹിയിലുള്ള പാണക്കാട് സാദിഖലി ശിഹാബ് തങ്ങളുമായി സംസാരിച്ചിരുന്നു. ലീഗ് ഞങ്ങളുടേതായ പരമ്പരാഗതമായ രീതിയില്‍ ഇടപെടും. യുഡിഎഫിന് ഒരു പ്രശ്‌നം വന്നാല്‍ ലീഗ് ഇടപെടുമല്ലോയെന്നും കുഞ്ഞാലിക്കുട്ടി പറഞ്ഞു.
അന്‍വര്‍ വന്ന് അദ്ദേഹത്തിന് പറയാനുള്ളതെല്ലാം ധരിപ്പിച്ചു എന്നത് സത്യമാണ്. അക്കാര്യങ്ങള്‍ കോണ്‍ഗ്രസ് നേതൃത്വവുമായി ചര്‍ച്ച ചെയ്തിട്ട് മാധ്യമങ്ങളോട് പറയേണ്ട കാര്യമുണ്ടെങ്കില്‍ പറയുന്നതാണ്. അന്‍വര്‍ നിലമ്പൂരില്‍ മത്സരിക്കുമോയെന്ന മാധ്യമങ്ങളുടെ ചോദ്യത്തിന് ഹൈപ്പോതെറ്റിക്കല്‍ ചോദ്യങ്ങള്‍ക്ക് മറുപടി പറയാന്‍ കഴിയില്ല. ബാക്കി നിലമ്പൂരില്‍ ചെന്നിട്ട് കാണാമെന്നും പി കെ കുഞ്ഞാലിക്കുട്ടി പറഞ്ഞു.
നിലമ്പൂര്‍ കോണ്‍ഗ്രസിന്റെ സീറ്റാണ്, അവര്‍ പറയട്ടെയെന്ന് രാവിലെ പി കെ കുഞ്ഞാലിക്കുട്ടിയുമായുള്ള കൂടിക്കാഴ്ചയ്ക്ക് ശേഷം പി വി അന്‍വര്‍ അഭിപ്രായപ്പെട്ടിരുന്നു. കോണ്‍ഗ്രസാണ് തീരുമാനമെടുക്കേണ്ടത്. മത്സരിക്കുന്നുണ്ടോ ഇല്ലയോ എന്നൊന്നും ഇപ്പോള്‍ പറയുന്നില്ല. അതൊക്കെ പറയാന്‍ സമയമാകുന്നതല്ലേയുള്ളൂവെന്നും പി വി അന്‍വര്‍ പറഞ്ഞു. മുമ്പും സ്വന്തം കാലിലാണ് നിന്നത്. ഇപ്പോഴും സ്വന്തം കാലിലാണ് നില്‍ക്കുന്നതെന്നും അന്‍വര്‍ പറഞ്ഞു.
വ്യക്തിപരമായി താനെടുത്ത രാഷ്ട്രീയ നിലപാടുകളോട് വളരെ സൗഹാര്‍ദ്ദപരമായ നിലപാട് സ്വീകരിച്ചവരാണ് മുസ്ലിം ലീഗ് പാര്‍ട്ടിയും അതിന്റെ നേതൃത്വവും. ആ നിലയ്ക്ക് ഇപ്പോഴുണ്ടായിരിക്കുന്ന കോംപ്ലിക്കേഷന്‍സ് കുഞ്ഞാലിക്കുട്ടിയെ ധരിപ്പിക്കാനുള്ള ധാര്‍മ്മിക ഉത്തരവാദിത്തം തനിക്കുണ്ട്. അത് അദ്ദേഹത്തെ ധരിപ്പിച്ചിട്ടുണ്ട്. പി വി അന്‍വര്‍ യുഡിഎഫിന്റെ ഭാഗമാകുമെന്ന് കെ സുധാകരന്‍ പറഞ്ഞുവെന്ന് മാധ്യമപ്രവര്‍ത്തകര്‍ ചൂണ്ടിക്കാട്ടിയപ്പോള്‍, ഭാഗമാകുമെന്ന് പറച്ചില്‍ തുടങ്ങിയിട്ട് എത്രമാസമായി എന്നായിരുന്നു അന്‍വറിന്റെ പ്രതികരണം. ഇനിയെന്ത് ഭാഗം ?. അന്‍വര്‍ ചോദിച്ചു.
തെരഞ്ഞെടുപ്പില്‍ മത്സരിക്കുമോയെന്നത് പിന്നീട് പറയേണ്ട സമയത്ത് പറയും. മുസ്ലിം ലീഗും പാണക്കാട് തങ്ങള്‍ കുടുംബവും കുഞ്ഞാലിക്കുട്ടിയും തുടക്കം മുതലേ പോസിറ്റീവായിട്ടാണ് താനെടുത്ത പൊളിറ്റിക്കല്‍ നിലപാടിനോട് പ്രതികരിച്ചിട്ടുള്ളത്. അതില്‍ രാഷ്ട്രീയമുണ്ടെന്ന് തിരിച്ചറിഞ്ഞ രാഷ്ട്രീയപാര്‍ട്ടിയാണ്. തന്നോട് സ്‌നേഹവും താല്‍പ്പര്യവും പ്രകടിപ്പിക്കുന്ന വ്യക്തി എന്ന നിലയ്ക്ക് കൂടിയാണ് കുഞ്ഞാലിക്കുട്ടിയെ കണ്ടത്. തന്റെ ഒരു വെല്‍വിഷര്‍ കൂടിയാണ് അദ്ദേഹം. ആ നിലയ്ക്ക് അദ്ദേഹത്തെ കണ്ട് പറയേണ്ട ഉത്തരവാദിത്തം ഉള്ളതു കൂടിയാണ് കണ്ടതെന്ന് അന്‍വര്‍ പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates