പാലക്കാട്: പരീക്ഷാ ദിവസങ്ങളിൽ കുട്ടികൾ വീട്ടിൽ നിന്ന് ഇറങ്ങുന്നതുതന്നെ ടെൻഷനടിച്ചാണ്. പഠിച്ച കാര്യങ്ങളും, അവസാനവട്ടം നോക്കാൻ ബാക്കിവച്ചതും ഒക്കെയായി നൂറുകൂട്ടം കാര്യങ്ങളായിരിക്കും ഈ സമയം ചിന്തിക്കുന്നത്. ആ യാത്രയ്ക്കിടെ ട്രാഫിക് ബ്ലോക്കിൽ കുടുങ്ങിയാൽ പിന്നെ പറയണോ... പരീക്ഷക്കെത്തില്ലെന്ന് പേടിച്ച് കരഞ്ഞ കുട്ടികൾക്ക് തക്കസമയത്ത് സഹായവുമായി എത്തിയത് പൊലീസാണ്. 

പാലക്കാട് വണ്ടിത്താവളം കെ കെ എം ഹയർ സെക്കൻഡറി സ്കൂളിലെ വിദ്യാർഥികളാണ് പരീക്ഷയ്ക്ക് പോകുന്നതിനിടെ റോഡിലെ ഗതാഗത കുരുക്കിൽ കുടുങ്ങിയത്. കൊല്ലങ്കോട്ടുനിന്നു വടവന്നൂർ വഴി വണ്ടിത്താവളത്തേക്കു പോകുന്ന സ്വകാര്യ ബസിലായിരുന്നു കുട്ടികൾ. ഗുഡ്സ് ഓട്ടോ കേടുവന്നു ചപ്പാത്തിൽ കുരുങ്ങിയത് വലിയ ഗതാഗതതടസ്സം സൃഷ്ടിച്ചു. പ്ലസ് വൺ കൊമേഴ്സ് വിദ്യാർഥികളായ മീര, കാവ്യ, നവ്യ എന്നിവരാണ് ബസിലുണ്ടായിരുന്നത്. 

കൃത്യസമയത്തു സ്കൂളിൽ എത്തില്ലെന്ന് പറഞ്ഞതോടെ ടെൻഷനിലായ കുട്ടികൾ റോഡിലിറങ്ങി പല വണ്ടികൾക്ക് കൈകാട്ടി. ആരും നിർത്താതെ വന്നപ്പോൾ കുട്ടികൾ നേരെ കൊല്ലങ്കോട് പൊലീസ് സ്റ്റേഷനിലെത്തി സഹായം തേടി. കരഞ്ഞുകൊണ്ട് സ്റ്റേഷനിൽ ഓടിയെത്തിയ കുട്ടികളെ പൊലീസ് വാഹനത്തിൽ കൃത്യസമയത്ത് പരീക്ഷാ ഹാളിൽ എത്തിക്കുകയായിരുന്നു. അധ്യാപകരെ കണ്ടു വിവരമറിയിച്ചു കുട്ടികൾ പരീക്ഷയെഴുതിയെന്ന് ഉറപ്പാക്കിയാണ് ഇവർ മടങ്ങിയത്.  

ഈ വാര്‍ത്ത കൂടി വായിക്കൂ 

വിക്രം എത്തി, അരിക്കൊമ്പനെ പിടിക്കാൻ ഡമ്മി റേഷൻ കട, കഞ്ഞിവച്ച് വരുത്തും; ആദ്യ ദൗത്യസംഘം പുറപ്പെട്ടു

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ