‌
കൊച്ചി: കാരണമില്ലാതെ വിമാനയാത്ര വിലക്കിയതിനെതിരെ കേരള ഹൈക്കോടതി ജ‍ഡ്ജി ബെച്ചു കുര്യൻ തോമസ് നൽകിയ ഹർജിയിൽ വിമാനക്കമ്പനി‌‍ ഏഴര ലക്ഷം രൂപ നഷ്ടപരിഹാരം നൽകണമെന്ന് ഉത്തരവ്. ജില്ലാ ഉപഭോക്തൃ തർക്കപരിഹാര കമ്മിഷനാണ് ഉത്തരവിട്ടത്. ഖത്തർ എയർവേയ്സിനെതിരെയാണ് നടപടി. 

2018 ഓഗസ്റ്റ് 30നു സമർപ്പിച്ച ഹർജിയിലാണ് ഉത്തരവ്. ജസ്റ്റിസ് ബെച്ചു കുര്യനും സുഹൃത്തുക്കളും കൊച്ചിയിൽ നിന്ന് സ്കോട്‌ലൻഡിലേക്കുള്ള യാത്രയ്ക്കായി നാല് മാസം മുൻപ് ടിക്കറ്റ് എടുത്തിരുന്നു. കൊച്ചിയിൽനിന്നു ദോഹയിലേക്കും അവിടെനിന്ന് എഡിൻബറയിലേക്കുമാണു ടിക്കറ്റ് നൽകിയത്. എന്നാൽ, ദോഹയിൽനിന്ന് എഡിൻബറയിലേക്കുള്ള യാത്ര അധികയാത്രക്കാരാണെന്ന കാരണം പറഞ്ഞ് വിലക്കുകയായിരുന്നു. ഇതു സേവനത്തിലെ വീഴ്ചയാണെന്ന് ചൂണ്ടിക്കാട്ടിയാണ് ഹർജി നൽകിയത്. 

രാജ്യാന്തര സർവീസുകളിൽ ഇങ്ങനെ യാത്ര മുടങ്ങുന്നത് സാധാരണയാണെന്നും അടുത്ത ദിവസത്തെ വിമാനത്തിൽ പോകാൻ താമസമുൾപ്പെടെ സൗകര്യങ്ങൾ നൽകാറുണ്ടെന്നും ഖത്തർ എയർവേയ്സ് വാദിച്ചു. എന്നാൽ, ഈ വാദം അന്യായവും അനുചിതവുമാണെന്നു കമ്മിഷൻ കുറ്റപ്പെടുത്തി. 30 ദിവസത്തിനകം നഷ്ടപരിഹാരം നൽകിയില്ലെങ്കിൽ 9% പലിശ നൽകണമെന്നും ഉത്തരവിൽ പറയുന്നു. 
‌

ഈ വാർത്ത കൂടി വായിക്കൂ 

35 രൂപയുടെ പശക്കുപ്പികളിൽ 40 രൂപയുടെ സ്റ്റിക്കർ പതിച്ച് വിതരണം; ഒരു ലക്ഷം പിഴയിട്ട് ലീഗൽ മെട്രോളജി വകുപ്പ് 

സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ