മണ്ണിടിച്ചിലുണ്ടായ കള്ളാടിയില്‍ ഇനിയും 5 പേരെ കണ്ടെത്താനുണ്ട്. ഇന്ന് പൂര്‍ണ തോതിലുള്ള തിരച്ചില്‍ നടക്കും. ഫിഫ ലോകകപ്പില്‍ ലോകചാംപ്യന്മാരെ വിറപ്പിച്ച് ഈജിപ്ത് കീഴടങ്ങി. അര്‍ജന്റീനയും സ്വിറ്റ്‌സര്‍ലന്‍ഡും ക്വാര്‍ട്ടറില്‍ കടന്നു. ടി 20 ക്രിക്കറ്റില്‍ ഇംഗ്ലണ്ടിനോട് നാണം കെട്ട തോല്‍വി വഴങ്ങി ഇന്ത്യ. ഇന്നത്തെ 5 പ്രധാന വാര്‍ത്തകള്‍ ( Top 5 News Today) അറിയാം.

മണ്ണിടിച്ചിലുണ്ടായ വയനാട്ടിലെ കള്ളാടിയില്‍ തിരച്ചില്‍ ഇന്നും തുടരും. രക്ഷാപ്രവര്‍ത്തനം ഇന്നലെ രാത്രി വരെ നീണ്ടു നിന്നിരുന്നു. അഞ്ചുപേരെയാണ് ഇനിയും കണ്ടെത്താനുള്ളത്. തിരച്ചിലിനായി കെഡാവര്‍ നായ്ക്കളും രംഗത്തുണ്ട്. ചികിത്സയില്‍ കഴിയുന്ന ഏഴു പേരില്‍ രണ്ടു പേരുടെ നില ഗുരുതരമാണ്. രക്ഷാപ്രവര്‍ത്തനം വിലയിരുത്താനായി മുഖ്യമന്ത്രി വിഡി സതീശന്‍ ഇന്ന് കള്ളാടിയിലെത്തും.

ഫിഫ ലോകകപ്പ് പ്രീക്വാര്‍ട്ടറില്‍ ഈജിപ്തിനെതിരെ അർജന്റീന വിജയിച്ചു. രണ്ടു ​ഗോളിന് പിന്നിൽ നിന്ന ശേഷമാണ് അർജന്റീനയുടെ വിജയം. രണ്ടിനെതിരെ മൂന്നു ​ഗോളിനാണ് അർജന്റീന വിജയിച്ചത്. വിജയത്തോടെ അർജന്റീന ക്വാർട്ടറിൽ കടന്നു. തുടക്കത്തിലേ ​ഗോൾ നേടി ഞെട്ടിച്ച ഈജിപ്ത് രണ്ടാംപകുതിയുടെ പകുതി സമയം വരെ അട്ടിമറി ജയം നേടുമെന്ന പ്രതീതി സൃഷ്ടിച്ചു. എന്നാൽ തുടരെ മൂന്നു ​ഗോളുകൾ മടക്കി അർജന്റീന വിജയം പിടിച്ചെടുത്തു. മത്സരത്തിൽ സൂപ്പർ താരം ലയണൽ മെയിയുടെ വകയായിരുന്നു രണ്ടാം ​ഗോൾ.

ലോകകപ്പിന്റെ പ്രീ-ക്വാര്‍ട്ടര്‍ പോരാട്ടത്തില്‍ നിലവിലെ ചാംപ്യന്മാരായ അര്‍ജന്റീനയോട് 3-2ന് പരാജയപ്പെട്ട് പുറത്തായതിന് പിന്നാലെ, കടുത്ത ആരോപണങ്ങളുമായി ഈജിപ്ത് മുഖ്യപരിശീലകന്‍ ഹോസം ഹസ്സന്‍ രംഗത്ത്. മത്സരത്തില്‍ തങ്ങള്‍ ക്രൂരമായി വഞ്ചിക്കപ്പെട്ടെന്നും, ലോക ചാംപ്യന്മാരായ അര്‍ജന്റീനയെയും സൂപ്പര്‍ താരം ലയണല്‍ മെസിയെയും ടൂര്‍ണമെന്റില്‍ നിലനിര്‍ത്താന്‍ റഫറിമാര്‍ ബോധപൂര്‍വ്വം ശ്രമിച്ചതായും ഹസ്സന്‍ വാര്‍ത്താസമ്മേളനത്തില്‍ തുറന്നടിച്ചു.

ആവേശം നിറഞ്ഞ പ്രീ-ക്വാര്‍ട്ടര്‍ പോരാട്ടത്തില്‍ കൊളംബിയയെ പെനാല്‍റ്റി ഷൂട്ടൗട്ടില്‍ 4-3ന് പരാജയപ്പെടുത്തി സ്വിറ്റ്‌സര്‍ലന്‍ഡ് ഫിഫ ലോകകപ്പിന്റെ ക്വാര്‍ട്ടര്‍ ഫൈനലിലേക്ക് യോഗ്യത നേടി. നിശ്ചിത സമയത്തും അധിക സമയത്തും ഇരുടീമുകള്‍ക്കും ഗോളുകളൊന്നും നേടാനാകാത്തതിനെ തുടര്‍ന്നാണ് മത്സരം പെനാല്‍റ്റി ഷൂട്ടൗട്ടിലേക്ക് നീണ്ടത്. 1954ല്‍ സ്വന്തം നാട്ടില്‍ നടന്ന ലോകകപ്പിന് ശേഷം ആദ്യമായാണ് സ്വിറ്റ്‌സര്‍ലന്‍ഡ് ലോകകപ്പിന്റെ ക്വാര്‍ട്ടര്‍ ഫൈനലില്‍ പ്രവേശിക്കുന്നത്.

ടി20 ക്രിക്കറ്റ് ചരിത്രത്തിലെ തങ്ങളുടെ ഏറ്റവും വലിയ നാണക്കേടിന്റെ റെക്കോര്‍ഡും പേറി നോട്ടിങ്ഹാമില്‍ നിന്ന് ടീം ഇന്ത്യ മടങ്ങുന്നു. ഇംഗ്ലണ്ടിനെതിരായ ടി20 പരമ്പരയിലെ മൂന്നാം മത്സരത്തില്‍ 125 റണ്‍സിന്റെ കനത്ത തോല്‍വിയാണ് ഇന്ത്യ വഴങ്ങിയത്. ഇംഗ്ലണ്ട് ഉയര്‍ത്തിയ 202 റണ്‍സെന്ന കൂറ്റന്‍ വിജയലക്ഷ്യം പിന്തുടര്‍ന്ന, ലോക ഒന്നാം നമ്പര്‍ ടീമായ ഇന്ത്യ വെറും 76 റണ്‍സിന് കൂടാരം കയറി. ടി20 അന്താരാഷ്ട്ര ക്രിക്കറ്റില്‍ ഇന്ത്യയുടെ ഏറ്റവും ചെറിയ രണ്ടാമത്തെ സ്‌കോറാണിത്.