ന്യൂഡൽഹി: ഇസ്രായേലിൽ ഷെല്ലാക്രമണത്തിൽ കൊല്ലപ്പെട്ട ഇടുക്കി കീരിത്തോട് സ്വദേശി സൗമ്യയുടെ മൃതദേഹം ഡൽഹിയിൽ എത്തിച്ചു. പുലർച്ചെ നാലരയോടെയാണ് മൃതദേഹം ഡൽഹിയിൽ എത്തിച്ചത്. കേന്ദ്ര സർക്കാർ പ്രതിനിധികളും ഇസ്രായേൽ എംബസി ഉദ്യോ​ഗസ്ഥരും ചേർന്ന് മൃതദേഹം ഏറ്റുവാങ്ങി. 

ശനിയാഴ്ച ഉച്ചയോടെ മൃതദേഹം സ്വദേശമായ ഇടുക്കിയിലെത്തിക്കും. കഴിഞ്ഞ 10 വർഷമായി ഇസ്രായേലിലെ അഷ്ക ലോണിൽ കെയർ ​ഗീവറായി ജോലി ചെയ്ത് വരികയായിരുന്നു സൗമ്യ. അഷ്ക ലോണിൽ താമസിച്ചിരുന്ന അപ്പാർട്ട്മെന്റിലേക്ക് ഹമാസിന്റെ റോക്കറ്റ് പതിക്കുകയായിരുന്നു. 

2017ലാണ് സൗമ്യ അവസാനമായി നാട്ടിലെത്തിയത്. മകനും ഭർത്താവും നാട്ടിലാണ് കഴിഞ്ഞിരുന്നത്. മൃതദേഹം വിട്ടുകിട്ടാൻ സൗമ്യയുടെ കുടുംബം നൽകിയ രേഖകൾ കഴിഞ്ഞ ദിവസം ഇസ്രായേൽ അധികൃതർക്ക് ഇന്ത്യൻ എംബസി അധികൃതർ കൈമാറിയിരുന്നു.