ലോകകപ്പിൽ സ്പെയിനും ബെൽജിയവും ക്വാർട്ടറിൽ കടന്നു. ഫുട്‌ബോള്‍ ഇതിഹാസം ക്രിസ്റ്റ്യാനോ റൊണാള്‍ഡോ കണ്ണീരോടെ മടങ്ങി. ലോകവിപണിയില്‍ ക്രൂഡ് ഓയില്‍ വില കുറഞ്ഞതോടെ, ഇന്ത്യയില്‍ ഇന്ധന വില കുറച്ചേക്കും. ഇഡി ഉദ്യോഗസ്ഥരെ ആക്രമിച്ച കേസില്‍ സിപിഎം പ്രവര്‍ത്തകരുടെ ജാമ്യാപേക്ഷയില്‍ ഇന്ന് വിധിയുണ്ടാകും. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം.

ലോകകപ്പിൽ സ്പെയിനും ബെൽജിയവും ക്വാർട്ടറിൽ കടന്നു. പോർച്ചു​ഗലിനെ എതിരില്ലാത്ത ഒറ്റ ​ഗോളിന് പരാജയപ്പെടുത്തിയാണ് സ്പെയിൻ ക്വാർട്ടറിൽ കടന്നത്. ഇഞ്ച്വറി ടൈമിൽ പകരക്കാരനായി ഇറങ്ങിയ മിഖേല്‍ മെറിനോയാണ് സ്പെയിനിന്റെ വിജയ​ഗോൾ നേടിയത്. ലോകകപ്പ് പ്രീ-ക്വാര്‍ട്ടര്‍ പോരാട്ടത്തില്‍ അമേരിക്കയെ ഒന്നിനെതിരെ നാല് ഗോളുകള്‍ക്ക് തകര്‍ത്തെറിഞ്ഞ് ബെല്‍ജിയം ക്വാര്‍ട്ടര്‍ ഫൈനലില്‍ പ്രവേശിച്ചു. ഇരട്ട ഗോളുകളോടെ തിളങ്ങിയ ചാര്‍ലസ് ഡി കെറ്റെലെയറാണ് ബെല്‍ജിയത്തിന്റെ വിജയശില്‍പി.

കാല്‍പ്പന്തുകളിയുടെ ചക്രവര്‍ത്തി ലോകകിരീടം എന്ന സ്വപ്‌നം ബാക്കിയാക്കി മടങ്ങുന്നു. ഫുട്‌ബോളിന്റെ വിശ്വവേദിയില്‍ ഇനി ആ 'സ്യൂ' മുഴക്കം കേള്‍ക്കാനാകില്ല. ഒരു തലമുറയുടെ മുഴുവന്‍ ആഘോഷമായി മാറിയ, ഗോളടിച്ചതിനു ശേഷം ഓടി, വായുവില്‍ ഉയര്‍ന്നുചാടി, ഇരുവശങ്ങളിലേക്കും കൈകള്‍ വീശിയുള്ള വിഖ്യാതമായ ആ ആഹ്ലാദപ്രകടനം ഇനിയുണ്ടാകില്ല. ലോകകപ്പെന്ന ഫുട്‌ബോളിന്റെ വിശ്വവേദിയില്‍ നിന്നും, ആരാധകരുടെ പ്രിയ സിആര്‍ 7 പടിയിറങ്ങി.

രാജ്യത്ത് പെട്രോള്‍, ഡീസല്‍ വില വൈകാതെ കുറച്ചേക്കുമെന്ന് റിപ്പോര്‍ട്ട്. അന്താരാഷ്ട്ര വിപണിയില്‍ ക്രൂഡ് ഓയില്‍ വില കുറഞ്ഞത് രാജ്യത്തെ പൊതുമേഖലാ എണ്ണ വിപണന കമ്പനികള്‍ക്ക് ആശ്വാസമായിട്ടുണ്ട്. ഈ പശ്ചാത്തലത്തില്‍ വരും ദിവസങ്ങളില്‍ വില കുറച്ചേക്കുമെന്നാണ് സൂചന. അസംസ്‌കൃത എണ്ണവില നിലവിലെ നിരക്കില്‍ തുടരുകയാണെങ്കില്‍, അടുത്ത 7 മുതല്‍ 10 ദിവസങ്ങള്‍ക്കുള്ളില്‍ പെട്രോള്‍, ഡീസല്‍ വില്‍പ്പനയിലെ നഷ്ടം പൂര്‍ണമായും ഒഴിവാക്കാന്‍ കമ്പനികള്‍ക്ക് സാധിക്കും.

പിണറായി വിജയന്റെ വീട്ടില്‍ പരിശോധനയ്‌ക്കെത്തിയ ഇഡി ഉദ്യോഗസ്ഥരെ ആക്രമിച്ച കേസില്‍ കോടതി വിധി ഇന്നുണ്ടായേക്കും. സിപിഎം പാളയം ലോക്കല്‍ സെക്രട്ടറി ഐപി ബിനു ഉള്‍പ്പെടെ 10 പ്രതികളുടെ ജാമ്യാപേക്ഷയാണ് തിരുവനന്തപുരം പ്രിന്‍സിപ്പല്‍ സെഷന്‍സ് കോടതി പരിഗണിക്കുന്നത്. ആക്രമണ ദൃശ്യങ്ങള്‍ കോടതി പരിശോധിച്ചു.

നാളുകളായി മനസ്സിലുണ്ടായിരുന്ന ഒരു ആശയം പ്രാവർത്തികമാക്കാൻ അവസരം ലഭിക്കും. സാമ്പത്തിക കാര്യങ്ങളിൽ വിവേകപൂർവമായ തീരുമാനങ്ങൾ നേട്ടമാകും. യാത്ര അനുകൂലമാകും. പ്രതീക്ഷിച്ച ഒരു വാർത്ത സന്തോഷം നൽകും. തൊഴിൽപരമായ കാര്യങ്ങളിൽ മുന്നേറ്റം ഉണ്ടാകും. വ്യാപാരത്തിൽ പുതിയ ബന്ധങ്ങൾ രൂപപ്പെടും. കലാകാരന്മാർക്ക് അംഗീകാരം ലഭിക്കും.