കോഴിക്കോട്: ഏക സിവില് കോഡിന് എതിരെ നടത്തുന്ന സെമിനാറില് മുസ്ലിം ലീഗ് പങ്കെടുക്കില്ലെന്ന നിലപാട് വ്യക്തമാക്കിയതിന് പിന്നാലെ സിപിഎമ്മിനെ പരിഹസിച്ച് പ്രതിപക്ഷ നേതാവ് വി ഡി സതീശന്. കോണ്ഗ്രസിന് നാലുപതിറ്റാണ്ട് കാലത്തെ സഹോദര ബന്ധമുള്ള ലീഗിനെ ക്ഷണിച്ചാല് അവര് പോകുമെന്ന് കരുതുന്ന സിപിഎം നേതാക്കള് ഇത്രയും ബുദ്ധിയില്ലാത്തവരായി മാറിയതില് അത്ഭുതമുണ്ടെന്ന് അദ്ദേഹം പറഞ്ഞു. സിപിഎം കേരളത്തില് നടത്തുന്ന വര്ഗീയ പ്രീണനത്തെ യുഡിഎഫ് പൊളിച്ചടുക്കി കെട്ടിത്തൂക്കുമെന്നും അദ്ദേഹം പറഞ്ഞു.
'കാപട്യവുമായാണ് സിപിഎം ഇപ്പോള് ഇറങ്ങിയിരിക്കുന്നത്. ഏക സിവില് കോഡ് രാജ്യത്ത് നടപ്പാക്കണമെന്നാണ് ഇഎംഎസ് പറഞ്ഞത്. ഏക സിവില് കോഡ് നടപ്പാക്കണമെന്ന് സിപിഎം അംഗങ്ങള് നിയമസഭയില് ആവശ്യപ്പെട്ടതിന്റെ മുപ്പത്തിയെട്ടാം വാര്ഷികമാണിന്ന്. സുശീലാ ഗോപാലന് അടക്കമുള്ള നേതാക്കള് ഏക സിവില് കോഡിനുവേണ്ടി സമരംചെയ്യണമെന്ന് പറഞ്ഞിട്ടുണ്ട്. എന്നിട്ടാണ് എംവി ഗോവിന്ദന് പറയുന്നത് കോണ്ഗ്രസിന് വ്യക്തതയില്ലെന്നാണ്. കോണ്ഗ്രസിന് വ്യക്തതയില്ലായിരുന്നെങ്കില് രാജ്യം ഭരിച്ചിരുന്ന കാലത്തുതന്നെ ഏക സിവില് കോഡ് നടപ്പാക്കിയേനെ. അധികാരത്തില് ഇരിക്കുമ്പോഴും അധികാരത്തില് നിന്ന് പുറത്തായപ്പോഴും ഏക സിവില് കോഡ് നടപ്പാക്കേണ്ടെന്ന് കൃത്യതയോടെ നിലപാടെടുത്ത പാര്ട്ടിയാണ് കോണ്ഗ്രസ്. ഇതൊരു മതപരമായ വിഷയമാക്കാതെ എല്ലാവരെയും ഒന്നിപ്പിക്കാനാണ് കോണ്ഗ്രസ് ശ്രമിക്കുന്നത്. ഭിന്നിപ്പിക്കുകയെന്ന തന്ത്രമാണ് ബിജെപിയുടേത്. അതിനിടിയില് ആരെയെങ്കിലും കിട്ടുമോയെന്ന് അറിയാനാണ് സിപിഎം ഇറങ്ങിയിരിക്കുന്നത്. ഇപ്പോള് നന്നായി കിട്ടിയല്ലോ. കിട്ടിയതും കൊണ്ടങ്ങ് പോയാല് മതി', സതീശന് പറഞ്ഞു.
'സമസ്ത ഉള്പ്പെടെയുള്ള മത സംഘടനകള്ക്ക് അവര്ക്ക് ഇഷ്ടമുള്ള പരിപാടികളില് പങ്കെടുക്കാനുള്ള സ്വാതന്ത്ര്യമുണ്ട്. മുസ്ലിം സമുദായം ഉള്പ്പെടെയുള്ളവര്ക്കിടയില് ഒരു അരക്ഷിതാവസ്ഥയുണ്ടായിട്ടുണ്ട്. അതുകൊണ്ടു തന്നെ കേരളത്തിലെ ഭരണകകക്ഷി നടത്തുന്ന സെമിനാറില് സമസ്ത പങ്കെടുക്കുന്നതില് ഒരു തെറ്റുമില്ല.
കോണ്ഗ്രസിന്റെ നേതൃത്വത്തില് ദേശീയ തലത്തില് ഒരു മതേതര പ്ലാറ്റ്ഫോം ഉണ്ടാകണമെന്ന ലക്ഷ്യത്തിന് മുന്നില് നില്ക്കുന്നയാളാണ് സിപിഎം ജനറല് സെക്രട്ടറി സിതാറാം യെച്ചൂരി. ദൗര്ഭാഗ്യവശാല് കേരളത്തിലെ സിപിഎം നേതാക്കള് ബിജെപിയുടെ ബി ടീമായാണ് പ്രവര്ത്തിക്കുന്നത്. കേരളത്തിലെ നേതാക്കളോട് മാത്രമെ ഞങ്ങള്ക്ക് അതൃപ്തിയുള്ളൂ', അദ്ദേഹം കൂട്ടിച്ചേര്ത്തു.
ഏക സിവില് കോഡിന് എതിരായ സിപിഎം സെമിനാറില് പങ്കെടുക്കേണ്ടതില്ലെന്ന് പാണക്കാട് ചേര്ന്ന മുസ്ലിം ലീഗ് നേതൃയോഗത്തില് തീരുമാനമായിരുന്നു. സിപിഎം ക്ഷണിച്ച സെമിനാറില് ലീഗ് പങ്കെടുത്താല് കേരളത്തിലെ രാഷ്ട്രീയ സാഹചര്യത്തിന് തന്നെ ദോഷമുണ്ടാകുമെന്ന് പാര്ട്ടി സംസ്ഥാന അധ്യക്ഷന് പാണക്കാട് സാദിഖലി ശിഹാബ് തങ്ങള് വാര്ത്താസമ്മേളനത്തില് പറഞ്ഞു.
ഇതിന് പിന്നാലെ, ലീഗ് സെമിനാറില് പങ്കെടുക്കാത്തത് തിരിച്ചടിയല്ലെന്നും ലീഗില് ഭിന്നിപ്പുണ്ടാക്കാന് ശ്രമിച്ചിട്ടില്ലെന്നും പറഞ്ഞ് സിപിഎം സംസ്ഥാന സെക്രട്ടറി എം വി ഗോവിന്ദന് രംഗത്തെത്തിയിരുന്നു.
ഈ വാര്ത്ത കൂടി വായിക്കൂ ഏക സിവില് കോഡ് രാജ്യത്തെ ഭിന്നിപ്പിക്കും: കാന്തപുരം
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates