മലപ്പുറം: നിലമ്പൂര്‍ ഉപതെരഞ്ഞെടുപ്പില്‍ പി വി അന്‍വര്‍ കടന്നു കയറിയത് എല്‍ഡിഎഫ് വോട്ടുകളിലെന്ന് കണക്കുകള്‍. 2021 ലെ നിയമസഭാ തെരഞ്ഞെടുപ്പില്‍ പി വി അന്‍വര്‍ ഇടതു സ്വതന്ത്രനായി മത്സരിച്ചപ്പോള്‍ എല്‍ഡിഎഫ് നിലമ്പൂരില്‍ സ്വന്തമാക്കിയത് 47 ശതമാനം വോട്ടുകള്‍ ആയിരുന്നു. ഇത്തവണ എം സ്വരാജിന് ലഭിച്ചത് ആകെ പോള്‍ ചെയ്തതിന്റെ 37.88 ശതമാനം വോട്ടു മാത്രം. സ്വതന്ത്ര സ്ഥാനാര്‍ഥിയായി മത്സരിച്ച് പി വി അന്‍വര്‍ ഇത്തവണ 11.23 ശതമാനം വോട്ടു സ്വന്തമാക്കി.

വിജയം സ്വന്തമാക്കിയെങ്കിലും യുഡിഎഫിന്റെ വോട്ട് ശതമാനത്തിലും ഇത്തവണ കുറവുണ്ടായിട്ടുണ്ട്. 2021 ല്‍ വി വി പ്രകാശ് സ്ഥാനാര്‍ഥിയായപ്പോള്‍ യുഡിഎഫ് സ്വന്തമാക്കിയത് 45.5 ശതമാനം വോട്ടുകളായിരുന്നു. എന്നാല്‍ ഇത്തവണ അത് 44.17 ശതമാനമായി കുറഞ്ഞു. ബിജെപിക്കും ഉപതെരഞ്ഞെടുപ്പില്‍ നേരിയ തോതില്‍ വോട്ട് വിഹിതത്തില്‍ കുറവുണ്ടായി. 2021 ല്‍ 5 ശതമാനം വോട്ടുകള്‍ നേടിയപ്പോള്‍ ഇത്തവണ 4.91 ശതമാനമായി കുറഞ്ഞു. നോട്ട 627 വോട്ടുകളും സ്വന്തമാക്കി. എസ്ഡിപിഐ 2075 വോട്ടുകള്‍ സ്വന്തമാക്കി.

ഇരുപക്ഷത്തോടും പടവെട്ടി ഇരുപതിനായിരത്തോളം വോട്ട്; മൂന്നാമതായിട്ടും 'ജയിച്ചുകയറി' അന്‍വര്‍

വോട്ടെണ്ണലിന്റെ ആദ്യ ഘട്ടത്തില്‍ യുഡിഎഫ് വോട്ടുകളാണ് പി വി അന്‍വര്‍ പിടിച്ചതെന്നായിരുന്നു വിലയിരുത്തല്‍. എന്നാല്‍ കോണ്‍ഗ്രസിന്റെ പമ്പരാഗത വോട്ടുകളില്‍ അന്‍വര്‍ അധികം കടന്നു കയറിയില്ലെന്നാണ് അന്തിമ ഫലം നല്‍കുന്ന സൂചന. അതേസമയം, കഴിഞ്ഞ തവണ എല്‍ഡിഎഫിന് ഒപ്പം നിന്ന വലിയൊരു വിഭാഗം അന്‍വറില്‍ വിശ്വാസം അര്‍പ്പിച്ചിരുന്നു എന്ന് കണക്കുകള്‍ വ്യക്തമാക്കുന്നു.

നിലമ്പൂര്‍ ഉപതെരഞ്ഞെടുപ്പില്‍ 11077 വോട്ടുകളുടെ ഭൂരിപക്ഷത്തോടെയാണ് യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്ത് വിജയം നേടിയത്. ആര്യാടന്‍ ഷൗക്കത്ത് - 77737 വോട്ടുകള്‍ നേടിയപ്പോള്‍ ഇടത് സ്ഥാനാര്‍ഥി എം സ്വരാജ് 66660 വോട്ടുകള്‍ സ്വന്തമാക്കി. പി വി അന്‍വര്‍ - 19760 വോട്ടുകള്‍ നേടിയപ്പോള്‍ നാലാം സ്ഥാനത്ത് എത്തിയ ബിജെപി സ്ഥാനാര്‍ഥി മോഹന്‍ ജോര്‍ജ് - 8648 വോട്ടുകള്‍ സ്വന്തമാക്കി.