പാലക്കാട്: വടക്കഞ്ചേരി പുതുക്കോട്ടെ യുവാവിന്റെ മരണം ഷോക്കേറ്റെന്ന് പോസ്റ്റ്‌മോര്‍ട്ടം റിപ്പോര്‍ട്ട്. മൃതദേഹം വാഹനത്തില്‍ കൊണ്ടുപോയി 2 കിലോമീറ്റര്‍ അകലെ ഉപേക്ഷിച്ചതാണെന്ന് പൊലീസ് പറയുന്നു.അപ്പക്കാട് യാക്കൂബിന്റെ മകന്‍ അജ്മലിനെയാണ് (21) കഴിഞ്ഞ വെള്ളിയാഴ്ച പുതുക്കോട് പാട്ടോലയ്ക്കു സമീപം റബര്‍ തോട്ടത്തില്‍ മരിച്ചനിലയില്‍ കണ്ടെത്തിയത്. സംഭവവുമായി ബന്ധപ്പെട്ടു 3 പേരെ പൊലീസ് കസ്റ്റഡിയിലെടുത്തു. 

മരണത്തില്‍ ദുരൂഹതയുണ്ടെന്ന പരാതിയെത്തുടര്‍ന്ന് അന്വേഷണം ശക്തമാക്കിയിരുന്നു. അതിനിടെയാണ് തൃശൂര്‍ മെഡിക്കല്‍ കോളജ് ആശുപത്രിയില്‍ നടത്തിയ പോസ്റ്റ്‌മോര്‍ട്ടത്തില്‍ മരണം ഷോക്കേറ്റാണെന്ന് തെളിഞ്ഞത്. യുവാവിന്റെ കാലില്‍ പൊള്ളലേറ്റ പാടുണ്ടായിരുന്നു. പൊലീസ് നടത്തിയ തെരച്ചിലില്‍ 2 കിലോമീറ്റര്‍ അകലെ ചെറുകാഞ്ഞിരക്കോട്ട് കാട്ടുപന്നിയെ ഷോക്കേല്‍പ്പിക്കാന്‍ വച്ച കമ്പിയും കുടുക്കും കണ്ടെത്തി. 

കെണി വച്ചവര്‍ അജ്മല്‍ മരിച്ചുകിടക്കുന്നതു കണ്ടതിനെത്തുടര്‍ന്നു മൃതദേഹം 2 കിലോമീറ്റര്‍ അകലെയുള്ള റബര്‍ തോട്ടത്തില്‍ കൊണ്ടുപോയി ഇടുകയായിരുന്നെന്നാണു വിവരം. സംഭവത്തില്‍ കൂടുതല്‍ പ്രതികള്‍ ഉള്‍പ്പെട്ടിട്ടുണ്ടെന്നു സൂചനയുണ്ട്. വ്യാഴാഴ്ച രാത്രി പത്തോടെയാണു യുവാവിനെ കാണാതായത്. വെള്ളിയാഴ്ച വൈകിട്ടു മൂന്നോടെ മൃതദേഹം കണ്ടെത്തി.