പ്രളയത്തില്‍ ദുരിതമനുഭവിക്കുന്ന ജനങ്ങള്‍ക്ക് സഹായമേകാന്‍ ഇത്തവണയും അന്‍പോട് കൊച്ചി പ്രവര്‍ത്തകര്‍. നടന്‍ ഇന്ദ്രജിത്ത്, ഭാര്യ പൂര്‍ണിമ എന്നിവരുടെ നേതൃത്വത്തിലാണ് അന്‍പോട് കൊച്ചിയുടെ പ്രവര്‍ത്തനം. ഇവരെ കൂടാതെ പാര്‍വതി, സരയു തുടങ്ങി നിരവധി താരങ്ങള്‍ അന്‍പോട് കൊച്ചിക്കൊപ്പം പ്രവര്‍ത്തിക്കുന്നുണ്ട്. 

ജില്ലാ ഭരണകൂടവുമായി സഹകരിച്ചാണ് മഴയും ഉരുള്‍പ്പൊട്ടലും ദുരിതം വിതച്ച ജില്ലകളിലെ ക്യാംപുകളിലേക്ക് ഇവര്‍ സഹായമെത്തിക്കുന്നത്. ഇന്ദ്രജിത്തും പൂര്‍ണ്ണിമയും ചേര്‍ന്നാണ് അന്‍പോട് കൊച്ചിയുടെ നേതൃത്വം വഹിക്കുന്നത്. കഴിഞ്ഞ രണ്ട് ദിവസങ്ങളായി ഇവര്‍ സാധനങ്ങള്‍ ശേഖരിക്കാനും അത് എത്തിക്കാനുമായി സജീവമാണ്. 

കടവന്ത്രയിലെ റീജിണല്‍ സ്‌പോര്‍ട്‌സ് സെന്ററിലാണ് സാധനങ്ങള്‍ ശേഖരിക്കുന്നത്. മലപ്പുറം, വയനാട്, കണ്ണൂര്‍ എന്നീ ജില്ലകളിലേക്കുള്ള സാധനങ്ങളാണ് ഇപ്പോള്‍ ശേഖരിക്കുന്നത്. കഴിഞ്ഞ വര്‍ഷത്തെപ്പോലെ തന്നെ ഇക്കൊല്ലവും എല്ലാവരും ഒറ്റക്കെട്ടായി നിന്ന് പ്രളയത്തെ നേരിടുമെന്ന സന്ദേശം ഇത്തരം കലക്ഷന്‍ സെന്റെറുകള്‍ക്ക് നല്‍കാനാകും. 

കഴിഞ്ഞ വര്‍ഷത്തെ മഹാപ്രളയത്തിലും അന്‍പോട് കൊച്ചി പ്രവര്‍ത്തകരുടെ സേവനം ശ്രദ്ധേയമായിരുന്നു. അന്ന് ടണ്‍ കണക്കിന് സാധനങ്ങളാണ് അവര്‍ ജില്ലയുടെ വിവിധ സ്ഥലങ്ങളിലെ ക്യാംപുകളിലേക്ക് എത്തിച്ചത്. സംസ്ഥാനത്തിന്റെ വിവിധ ഭാഗങ്ങളിലെ നാല് ലക്ഷം പേര്‍ക്കാണ് അന്‍പോട് കൊച്ചി സഹായമെത്തിച്ചത്.

ദുരിതാശ്വാസ ക്യാംപുകളിലേയ്ക്ക് അയയ്‌ക്കേണ്ട സാധനങ്ങള്‍ പൊതുജനങ്ങളില്‍ നിന്ന് ശേഖരിച്ച് അവ തരംതിരിച്ച് പ്രത്യേക കിറ്റുകള്‍ തയാറാക്കുകയാണ് ഇവിടെ ചെയ്യുന്നത്.